Лукашэнка: Ах, ІКЕА!.. Да пабачэння! Мы гэтыя табурэткі, крэслы і іншае зробім

12 снежня, BPN. Падчас разгляду кадравых пытанняў 12 снежня Аляксандр Лукашэнка заявіў, што яго патрабаванне аб нацыяналізацыі замежных прадпрыемстваў, чые ўласнікі пайшлі з беларускага рынку, распаўсюджваецца ў тым ліку на вытворчасці міжнароднай кампаніі ІКЕА.

“Ах, ІКЕА!.. Да пабачэння! Мы гэтыя табурэткі, крэслы і іншае зробім. Ці дэталі для ложкаў. Яны ж у асноўным дэталі для кухні, для ложкаў, мэблі рабілі. Што, мы не можам зрабіць? Тым больш яны ж нічога не забралі і людзі засталіся, — цытуе Лукашэнку яго прэс-служба. — Пайшоў гаспадар — ну і ідзі. На рынку попыт вялікі, на тым жа рынку ў Расіі, Беларусі і гэтак далей мы можам вырабляць гэтыя дэталі і ім пастаўляць, як пастаўлялі” .

Аб планах сысці з Беларусі ўслед за РФ (пасля пачатку поўнамаштабнай вайны з Украінай) ІКЕА заявіла ў сакавіку. Літоўскі холдынг VMG Group, які інвеставаў у дрэваапрацоўчую прамысловасць у партнёрстве з ІКЕА, прыпыніў дзейнасць у краіне ў чэрвені.

У апублікаваным у лістападзе расследаванні нямецкай газеты taz і французскага анлайн-выдання Disclose сцвярджаецца, што пастаўшчыкі рознічнай сеткі з Беларусі (тэкстыльнае прадпрыемства “Магатэкс”, мэблевае “Івацэвічыдрэў”, холдынг арганізацый дрэваапрацоўчай прамысловасці Borwood (штаб-кватэра ў Мінску), куды ўваходзяць прадпрыемствы “БР-Вуд” (Бабруйск), “БР-Форэст” (Барысаў), “Віцебскдрэў”) выкарыстоўваюць працу зняволеных.

У адказе на запыт BPN ІКЕА не прызнала выкарыстанне працы беларускіх зняволеных.

Нідэрландская кампанія, заснаваная ў Швецыі ў 1943 годзе, ІКЕА прыйшла на беларускі рынак у 1999 годзе, а ў 2007 годзе ў Нідэрландах адкрылася фірма Ingka Belarus BV (Ingka — юрыдычная назва ІКЕА, па імені заснавальніка Інгвара Кампрада). Закупкі ў Беларусі выраслі са 130 млн еўра ў 2018 годзе да 300 млн — у 2021-м.

Гл. таксама па тэме:

Лукашэнка прыступіў да нацыяналізацыі замежных прадпрыемстваў, пакінутых уладальнікамі