ЗША ўвялі санкцыі супраць беларускай кампаніі “ДМТ Трэйдынг”

3 сакавіка, BPN. Бюро прамысловасці і бяспекі Міністэрства гандлю ЗША 2 сакавіка дадало ў пералік арганізацый, на якія распаўсюджваюцца правілы экспартнага кантролю, 37 юрыдычных асоб, у тым ліку па адной з Беларусі і Расіі.

Пад абмежаванні трапілі беларуская кампанія “ДМТ Трэйдынг” (Мінск) і прадстаўнік яе інтарэсаў на тэрыторыі Расіі — “ДМТ Электронікс” (Масква).

Як сцвярджаецца на сайце арганізацыі, “ДМТ Трэйдынг” працуе з 1996 года і з’яўляецца “вядучым пастаўшчыком электронных кампанентаў і вымяральнай тэхнікі, а таксама буйным інжынерна-тэхнічным цэнтрам, здольным вырашаць шырокі спектр задач у галіне высокіх тэхналогій”.

Асноўнымі кірункамі дзейнасці з’яўляюцца “распрацоўка і выраб складаных праграмн-аапаратных вымяральных, выпрабавальных, аналітычных і прамысловых комплексаў сямейства “ДМТ”, праектаванне і камплектаванне цэнтраў уваходнага кантролю электронных кампанентаў, метралагічных лабараторый і выпрабавальных цэнтраў”.

Кампанія камплектуе прамысловыя прадпрыемствы “пад ключ”, пастаўляючы “ад рэзістара да дызельных электрастанцый і элементаў АСКТП”, а таксама з’яўляецца “найбуйнейшым пастаўшчыком святлодыёдаў і спадарожных ім кампанентаў для вытворчасці святлодыёдных свяцільняў”.

За апошнія некалькі гадоў дэмакратычныя краіны ўвялі ў дачыненні да Беларусі мноства абмежавальных мераў — пераважна з-за парушэння Мінскам правоў чалавека. Санкцыі ўводзіліся за фальсіфікацыю прэзідэнцкіх выбараў у 2020 годзе і жорсткае падаўленне распачатых пасля іх пратэстаў, прымусовую пасадку самалёта Ryanair і наступны арышт апазіцыянераў, якія ляцелі на ім, штучна створаны міграцыйны крызіс на мяжы з краінамі ЕС, дапамога Расіі ў ваеннай агрэсіі супраць Украіны.