Лукашэнка: У выпадку агрэсіі супраць Беларусі Расія павінна абараняць яе як уласную тэрыторыю

10 красавіка, BPN. У выпадку агрэсіі супраць Беларусі Расія павінна абараняць яе як уласную тэрыторыю, заявіў Аляксандр Лукашэнка 10 красавіка на сустрэчы ў Мінску з міністрам абароны РФ Сяргеем Шайгу.

Лукашэнка, паведамляе ягоная прэс-служба, лічыць, што заходнія краіны парушылі дамоўленасці ў рамках Будапешцкага мемарандума ў абмен на вывад ядзернай зброі.

Паводле яго слоў, Захад “кляўся гарантаваць поўную бяспеку” Казахстану, Украіне і Беларусі.

“Натуральна, вы ведаеце, што заходнія дзяржавы растапталі ўсе гэтыя дагаворы, пагадненні і заявы, і ніякай бяспекі няма, — падкрэсліў ён. — Малася на ўвазе эканамічная бяспека ў тым ліку. Ну якая эканамічная бяспека, калі яны ўводзяць супраць нас, Расіі санкцыі?”

Лукашэнка сцвярджае, што Уладзімір Пуцін прапанаваў “прарэвізаваць усе нашы дамовы і пагадненні — Беларусі і Расіі, — паглядзець, які нарматыўны прававы акт міждзяржаўнага характару трэба прыняць зараз, каб гарантаваць поўную бяспеку Беларусі”.

“Ну якія нам гарантыі бяспекі Амерыка можа даць? Ды ніякіх. Акрамя падганяння агрэсіі супраць нас, як бачым мы цяпер. Нам ад нашай брацкай Расіі патрэбны поўныя гарантыі бяспекі. І вось мы з Пуціным, растаючыся, яшчэ раз закранулі гэтае пытанне і дамовіліся, што вы са спецыялістамі прыедзеце сёння і мы гэтае пытанне сур’ёзна абмяркуем у кантэксце той сітуацыі, якая складваецца вакол нас сёння. У тым ліку і спецыяльнай ваеннай аперацыі”, — сказаў ён.

Прэзідэнт Расіі ў інтэрв’ю тэлеканалу “Расія 24”, паказаным 25 сакавіка, заявіў, што да 1 ліпеня на тэрыторыі Беларусі будзе завершана будаўніцтва спецыяльнага сховішча для тактычнай ядзернай зброі. “Мы не перадаем [ядзерную зброю]. Мы ў прынцыпе робім усё, што яны [ЗША] робяць дзесяцігоддзямі. Яны маюць яе ў многіх краінах-саюзніках, рыхтуюць носьбіты і экіпажы. Тое ж самае збіраемся рабіць і мы”, — сказаў Пуцін.

28 сакавіка прэс-сакратар Міністэрства замежных спраў Беларусі Анатоль Глаз заявіў, што “навучанне беларускіх пілотаў, здольных кіраваць самалётамі са спецыфічнымі боепрыпасамі, мадэрнізацыя такіх самалётаў, роўна як і размяшчэнне ядзерных боезарадаў на тэрыторыі Беларусі без перадачы Мінску кантролю за імі, а таксама доступу да адпаведным тэхналогіям, ніякім чынам не супярэчаць палажэнням артыкулаў I і II” Дагавора аб нераспаўсюджванні ядзернай зброі.

31 сакавіка Лукашэнка, выступаючы са штогадовым пасланнем народу і парламенту, фактычна абверг заяву ўласнага знешнепалітычнага ведамства ў той частцы, якая тычыцца кантролю над ядзернымі боезарадамі. “Усё будзе па законе і па правілах. Бескантрольнай зброі і іншага ў Беларусі няма і быць не можа. Кіраваць усім, што ёсць у Беларусі, будзем мы тут”, — сказаў ён.

У той жа дзень прадстаўнік РФ у Арганізацыі Аб’яднаных Нацый Васіль Небензя на пасяджэнні Савета Бяспекі ААН, прысвечаным гэтаму пытанню, зазначыў, што Масква “развівае супрацоўніцтва з Беларуссю, не парушаючы абавязацельстваў”. “Мы не перадаем ядзерную зброю. Размова ідзе аб перааснашчэнні самалётаў і навучанні брыгад пры будаўніцтве сховішча на тэрыторыі Беларусі”, — падкрэсліў дыпламат.

Пасол Расіі ў Мінску Барыс Грызлоў заявіў, што сховішча расійскай ядзернай зброі будзе “прысунута да заходніх граніц Саюзнай дзяржавы”.

Планы РФ асудзілі краіны Захаду, прадстаўнікі беларускіх дэмсіл, насцярожана выказаўся Кітай.

Амерыканскі Інстытут вывучэння вайны (ISW) у справаздачы за 4 красавіка зазначыў, што разгортванне Расіяй тактычнай ядзернай зброі ў Беларусі “наўрад ці паўплывае на рэаліі баявых дзеянняў ва Украіне”, рызыка ядзернай эскалацыі “застаецца надзвычай нізкай”.