ЕЭК: Беларусь страціла лідарства ў ЕАЭС па дынаміцы вытворчасці сельгаспрадукцыі

7 жніўня, Позірк. Па выніках студзеня — чэрвеня 2023 года Беларусь заняла трэцяе месца ў Еўразійскім эканамічным саюзе (ЕАЭС) па дынаміцы вытворчасці сельскагаспадарчай прадукцыі ў гадавым вымярэнні, сведчаць даныя дэпартамента статыстыкі Еўразійскай эканамічнай камісіі (ЕЭК).

Мінск лідзіраваў па гэтым паказчыку ў студзені — красавіку і студзені — траўні ў параўнанні з аналагічнымі перыядамі 2022 года. 

Па выніках першага паўгоддзя на першае месца выйшаў Казахстан (+3,2%). Далей ідуць Расія (+2,9%), Беларусь (+2,7%), Кыргызстан (+2,5%) і Арменія (+1,6%). 

Аб’ём вытворчасці жывёлы і птушкі на забой (у жывой вазе) у Казахстане павялічыўся на 4,5% (1 млн 6,6 тыс. т), Расіі — на 2,6% (7 млн 596 тыс. т), Кыргызстане — на 1,2% (192,5 тыс. т), Беларусі — на 1,1% (841,2 тыс. т). 

Па тэмпах росту вытворчасці малака лідзіруе Беларусь (+5,5%; 4 млн 120,5 тыс. т). Далей ідуць Расія (+3,2%; 16 млн 618,9 тыс. т), Казахстан (+2,9%; 3 млн 187,1 тыс. т), Кыргызстан (+2,1%; 816,7 тыс. т), Арменія (-5,2%; 344,5 тыс. т). 

Разам з тым па вытворчасці яек горшую дынаміку прадэманстравала менавіта Беларусь (-6,3%; 1 млрд 595,4 млн адз.), а таксама Арменія (-3,3%; 420,6 млн адз.) і Казахстан (-1,8%; 2 млрд 423,7 млн). У Расіі па гэтым паказчыку назіраўся рост на 2,5% (23 млрд 291,7 млн адз.), Кыргызстане — на 15,5% (352,5 млн). 

Паводле даных ЕЭК, цэны вытворцаў сельскагаспадарчай прадукцыі ў ЕАЭС у гадавым вымярэнні (чэрвень 2023 года да чэрвеня 2022-га) выраслі толькі ў Беларусі.

У цэлым па ЕАЭС у чэрвені да траўня 2023-га яны знізіліся на 0,9%, у гадавым вымярэнні — на 6,2%: Арменія (-9,9%; -7,4%), Кыргызстан (-2,3%; -3,7%), Беларусь (-1,7%; +5,7%), Расія (-0,7%; -7,7%), Казахстан (-0,9%; -3,2%). 

Па выніках мінулага года, паводле даных ЕЭК, сельгасвытворчасць вырасла ва ўсіх краінах ЕАЭС: Расіі — на 10,2%, Казахстане — на 9,1%, Кыргызстане — на 7,3%, Беларусі — на 3,6%, Арменіі — на 1,6%. 

Цэны на прадукцыю гэтай галіны ў 2022-м у гадавым вымярэнні павялічыліся ў Беларусі (+24,1%), Арменіі (+14,3%) і Казахстане (+9%). У Кыргызстане і Расіі яны знізіліся на 4% і 4,1% адпаведна. 

Намінальная налічаная сярэдняя заработная плата ў сельскай гаспадарцы Беларусі ў чэрвені склала 1.486,1 рубля — на 22,9% менш, чым сярэдняя па краіне (1.927,1). 

Запазычанасць па крэдытах, выдадзеных банкамі юрыдычным асобам у гэтай галіне ў нацыянальнай і замежнай валютах, на 1 ліпеня склала 3 млрд 315,3 млн рублёў (+6,8% з пачатку 2023 года; +11,1% за 12 месяцаў), пратэрмінаваная запазычанасць — 13,2 млн (+53,5%; -0,8%). 

У 2022 годзе дзяржава “аказала значную падтрымку” прадпрыемствам аграпрамысловага комплексу (АПК), заявіў у сярэдзіне студзеня першы намеснік старшыні Нацыянальнага банка Сяргей Калечыц на пашыраным пасяджэнні праўлення рэгулятара. Паводле яго слоў, у адпаведнасці з прынятымі нарматыўнымі прававымі актамі ў сектар АПК “накіраваны крэдытныя рэсурсы ў суме 2,6 млрд рублёў”, у тым ліку на закупку тэхнікі і абсталявання — 715 млн рублёў. 

Гл. таксама: 

За чатыры гады пагалоўе буйной рагатай жывёлы ў Беларусі скарацілася на 76,5 тыс.