Палітзняволены палітык Павел Севярынец будзе пераведзены з калоніі ў турму

22 чэрвеня, BPN. Суд Шклоўскага раёна (Магілёўская вобласць) 21 чэрвеня змяніў рэжым утрымання сустаршыні аргкамітэта па стварэнні партыі “Беларуская хрысціянская дэмакратыя” (БХД) Паўла Севярынца, паведамляе праваабарончы цэнтр “Вясна”.

Суддзя Аляксандр Тараканаў пастанавіў накіраваць палітзняволенага палітыка ў турму на 3 гады. Паводле інфармацыі праваабаронцаў, неўзабаве ён будзе пераведзены з калоніі.

Севярынца затрымалі 7 чэрвеня 2020 года, у разгар кампаніі па зборы подпісаў за вылучэнне кандыдатаў у прэзідэнты. Ён у гонцы не ўдзельнічаў, але выкарыстоўваў перадвыбарчы перыяд для размоў з людзьмі. У той дзень ён правёў на плошчы ля сталічнага Камароўскага рынку “народны пікет свабоды і салідарнасці”.

25 траўня 2021 года Магілёўскі абласны суд прыгаварыў яго да 7 гадоў пазбаўлення волі ва ўмовах узмоцненага рэжыму паводле абвінавачання ў “падрыхтоўцы да масавых беспарадкаў”.

27 жніўня таго ж года Вярхоўны суд адхіліў яго скаргу на вырак.

23 сакавіка 2022-га МУС уключыла Севярынца ў “пералік грамадзян Рэспублікі Беларусь, замежных грамадзян або асоб без грамадзянства, што маюць дачыненне да экстрэмісцкай дзейнасці”.