Лукашэнка падпісаў закон, які надзяляе Мінінфарм правам прыпыняць пасведчанні аб дзяржрэгістрацыі выдавецтваў

17 ліпеня, BPN. Аляксандр Лукашэнка зацвердзіў папраўкі ў закон “Аб выдавецкай справе ў Рэспубліцы Беларусь”. Дакумент “скіраваны на ўдасканаленне механізмаў абароны нацыянальных інтарэсаў у сферы выдавецкай дзейнасці”, паведамляе неафіцыйны тэлеграм-канал яго прэс-службы.

Адзначаецца, што, паводле зацверджаных папраўак, Міністэрства інфармацыі “надзяляецца паўнамоцтвамі на прыняцце рашэнняў аб прыпыненні дзеяння пасведчанняў аб дзяржаўнай рэгістрацыі выдаўцоў і скасаванне паўнамоцтваў суда на прыняцце такіх рашэнняў”.

Таксама закон прадугледжвае “пашырэнне пераліку падстаў для перарэгістрацыі выдаўцоў і вытворцаў друкаванай прадукцыі і для прыпынення дзеяння пасведчання аб дзяржаўнай рэгістрацыі ў якасці выдаўца”.

31 траўня законапраект быў прыняты ў першым чытанні Палатай прадстаўнікоў Нацыянальнага сходу, 30 чэрвеня яго адобрыў Савет Рэспублікі.

Пасля прэзідэнцкіх выбараў 2020 года многія беларускія незалежныя выдаўцы зазналі ганенні і рэпрэсіі.

Сёлета ў студзені выдавецтва “Янушкевіч” у судовым парадку было пазбаўлена ліцэнзіі. 22 сакавіка 2022 года арэндадаўца запатрабаваў ад выдавецтва вызваліць офіс. 16 траўня таго ж года, у дзень адкрыцця, адбыўся ператрус у мінскай краме выдавецтва — “Кнігаўка”. Янушкевіча і супрацоўніцу крамы — літаратуразнаўцу і блогера Насту Карнацкую — затрымалі і некалькі разоў запар арыштоўвалі (усяго на 28 і 23 дні адпаведна). Янушкевіч пасьля гэтага пакінуў краіну і аднавіў працу ў Польшчы.

У красавіку і траўні 2022 года Міністэрства інфармацыі прыпыніла дзейнасць выдавецтваў “Мэдысонт”, “Галіяфы”, “Лімарыус” і “Кнігазбор”.

Эканамічны суд Мінска на падставе пазову Міністэрства інфармацыі сёлета 10 траўня ліквідаваў выдавецкі дом Змітра Коласа.