Падтрымка Берлінам санкцый ЕС супраць Беларусі “выклікае ў глыбокае расчараванне” — Лукашэнка

3 кастрычніка, Позірк. Падтрымка санкцый супраць Беларусі з боку афіцыйнага Берліна “наносіць шкоду і абсалютна не адпавядае надзеям двух народаў”, адзначыў Аляксандр Лукашэнка, віншуючы 3 кастрычніка жыхароў ФРГ з Днём адзінства.

Паводле яго слоў, аб’яднанне Германіі ў 1990 годзе стала магчыма дзякуючы “атмасферы даверу і канструктыўнага супрацоўніцтва паміж краінамі кантынента”.

“Пераход ад супрацьстаяння да дыялогу запатрабаваў тады ад усіх бакоў прыняцця адважных, стратэгічных рашэнняў, — прыводзіць тэкст віншавання прэс-служба Лукашэнкі. — На жаль, цяпер Еўрапейскі саюз праводзіць несамастойную палітыку канфрантацыі ў дачыненні да шэрагу суверэнных дзяржаў. Адзіным інструментам Бруселя з’яўляюцца аднабаковыя меры эканамічнага і палітычнага ціску, якія наўпрост супярэчаць міжнароднаму праву”.

Паводле яго слоў, “санкцыйны курс” нямецкага ўрада выклікае ў Беларусі “глыбокае расчараванне і абгрунтаванае непрыманне, асабліва з улікам жудасных падзей і шматлікіх ахвяр на беларускай зямлі падчас Другой сусветнай вайны”.

“Праз 100 гадоў з дня ўсталявання дыпламатычных стасункаў Беларусь, як і раней, гатовая развіваць супрацоўніцтва з ФРГ на аснове прынцыпаў раўнапраўя і ўзаемнай павагі. Гэта будзе таксама садзейнічаць умацаванню рэгіянальнай бяспекі і стабільнасці”, — заявіў Лукашэнка.

Пасля выбараў 2020 года ў Беларусі ўлады ФРГ не прызналі Лукашэнку законна абраным прэзідэнтам. Берлін дапамагае грамадзянскай супольнасці Беларусі, палітычным эмігрантам, незалежным СМІ. Федэральны прэзідэнт Франк-Вальтэр Штайнмаер сустракаўся з дэмакратычным лідарам Святлану Ціханоўскую ў снежні 2020-га, лістападзе 2021-га і красавіку 2022 года.

7 верасня 2023-га, у трэцюю гадавіну затрымання паплечніцы Ціханоўскай Марыі Калеснікавай, нямецкі палітык заявіў, што Берлін думае пра многіх, “хто сядзіць у Беларусі ў турме толькі за заклікі да законнасці, свабоды і дэмакратыі”.

Дзяржаўны міністр МЗС ФРГ Тобіяс Лінднер 21 верасня ў Нью-Ёрку на мерапрыемстве “Пагроза незалежнасці Беларусі і міжнародны адказ” на палях 78-й сесіі Генасамблеі ААН звярнуў увагу на тое, што “Расія і рэжым Лукашэнкі падрываюць незалежнасць Беларусі размяшчэннем ядзернай зброі, расійскіх войскаў”, але Германія “бачыць супраціўленне беларусаў”. Паводле яго слоў, Берлін распрацаваў “адмысловую праграму падтрымкі грамадзянскай супольнасці Беларусі”.

22 сакавіка падчас мерапрыемства, прымеркаванага да 80-годдзя хатынскай трагедыі, Лукашэнка заявіў: “Дагэтуль мы імкнуліся не абцяжарваць пачуццём віны дзяцей і ўнукаў катаў, якія прыйшлі на нашу зямлю, каб канчаткова вырашыць пытанне з намі, з усходнімі славянамі. Мы раней не падкрэслівалі, што большасць краін Заходняй Еўропы ўсталі пад сцягі гітлераўскай Германіі і сусветны капітал аплаціў гэты паход. Яны супраць нас сёння санкцыі ўводзяць, развязалі эканамічную і інфармацыйную вайну”.

Паводле інфармацыі афіцыйнага Мінска, першыя афіцыйныя дыпламатычныя кантакты паміж Беларуссю і Германіяй адбыліся ў 1923 годзе. 13 сакавіка 1992 года ў беларускай сталіцы было падпісана пагадненне з ФРГ аб аднаўленні дыпламатычных стасункаў. У абедзвюх краінах адкрытыя пасольствы.

Германія была адным з вядучых знешнегандлёвых партнёраў Беларусі. У 2021 годзе яна заняла 4-е месца паводле аб’ёму тавараабароту — 3 млрд 418,3 млн долараў (беларускі экспарт — 1 млрд 665 млн, нямецкія пастаўкі — 1 млрд 753,3 млн).

Пазней МЗС канстатавала, што “ва ўмовах дзеяння шэрагу неспрыяльных фактараў аб’ём двухбаковага гандлю ў 2022 годзе зменшыўся”.