5 кастрычніка, Позірк. Мінску і Бішкеку трэба “ўзмацняць рэгіянальнае супрацоўніцтва” па прыкладзе ўзаемадзеяння Беларусі і Расіі, заявіў Аляксандр Лукашэнка 5 кастрычніка ў Мінску на сустрэчы са спікерам парламента Кыргызстана Нурланбекам Шакіевым.
“Хацелася б, каб гэты досвед быў перанесены і на беларуска-кыргызскія стасункі. Тым больш што гэта ў нас у полі зроку парламента”, — цытуе Лукашэнку яго прэс-служба.
У Кыргызстане, сцвярджае ён, сёння “паспяхова рэалізуецца” шмат інфраструктурных праектаў. “Калі мы можам быць вам нечым карысныя ў будаўніцтве інфраструктуры вашай дзяржавы, у эканоміцы, калі ласка, мы гатовыя”, — прапанаваў Лукашэнка.
Паводле яго слоў, беларускія ўлады гатовыя “ўсяляк садзейнічаць таму, каб Кыргызстан не быў нейкай там краінай у куце і наводшыбе”. У гэтай краіне, упэўнены Лукашэнка, жыве “вельмі актыўная, вельмі прасунутая” нацыя.
“У нас вельмі добрыя ўзаемаадносіны па ўсіх лініях. І на ўзроўні прэзідэнтаў, і на ўзроўні ўрада. <…> Я добра ведаю кыргызаў — гэта людзі вельмі разумныя. Таму мы знойдзем новыя агульныя пункты судакранання. У гэтым кірунку мы будзем з вамі працаваць, калі ў вас да гэтага будзе інтарэс”, — заявіў ён.
Беларусь і Кыргызстан з’яўляюцца партнёрамі ў рамках Еўразійскага эканамічнага саюза і Садружнасці Незалежных Дзяржаў, а таксама саюзнікамі ў Арганізацыі Дагавора аб калектыўнай бяспецы.
У канцы жніўня дзяржаўныя СМІ паведамлялі са спасылкай на віцэ-прэм’ера Анатоля Сівака, што паводле вынікаў 2022 года тавараабарот паміж Беларуссю і Кыргызстанам перавысіў 160 млн долараў.
Аўтарызавацца
Забыліся пароль?
Выхад з профілю
