Беларускія артылерысты атрымалі мадэрнізаваную сістэму залпавага агню “Паланэз-М”

15 лістапада, Позірк. Комплекс мадэрнізаванай рэактыўнай сістэмы залпавага агню (РСЗА) айчыннай вытворчасці “Паланэз-М” 15 лістапада паступіў на ўзбраенне “рэактыўнай артылерыйскай брыгады Узброеных сіл”, паведамляе прэс-служба Міністэрства абароны.

Ведамства сцвярджае, што “многія тэхнічныя рашэнні, рэалізаваныя беларускімі распрацоўшчыкамі сістэм рэактыўнай артылерыі, не маюць аналагаў у свеце”.

Заяўляецца, што асноўныя тактыка-тэхнічныя характарыстыкі сістэмы “Паланэз-М”, якая адпавядае “лепшым сусветным узорам сістэм рэактыўнай артылерыі”, палепшаныя ў параўнанні з базавай мадэллю “Паланэз”. Паляпшэнні, паводле даных Мінабароны, дазваляюць “адной баявой машынай адначасова нанесці з высокай дакладнасцю ўдар па васьмі цэлям на далёкасці да 300 км”.

Патэнцыйнымі цэлямі для сістэмы “Паланэз-М” ведамства называе камандныя пункты, арсеналы з боепрыпасамі, скопішча тэхнікі і засяроджванне жывой сілы.

Сцвярджаецца, што прыняцце новых узораў узбраення з’яўляецца “адным з элементаў стратэгічнага стрымлівання”.

РСЗА “Паланэз” упершыню была прадэманстравана 9 траўня 2015 года на вайсковым парадзе ў Мінску. Паводле даных адкрытых крыніц, сістэма здольная паражаць цэлі на далёкасці 50-300 км. Першыя баявыя пускі зробленыя ў 2016 годзе ў Гомельскай вобласці. У тым жа годзе сістэма паступіла на ўзбраенне 336-й рэактыўнай артылерыйскай брыгады.