Кіраўнік МЗС Арменіі таксама адмовіўся прыязджаць у Мінск на сустрэчу ў рамках АДКБ

21 лістапада, Позірк. У ходзе тэлефоннай размовы з беларускім калегам Сяргеем Алейнікам міністр замежных спраў Арменіі Арарат Мірзаян паведаміў, што не прыедзе ў Мінск 22 лістапада для ўдзелу ў пасяджэнні савета міністраў замежных спраў, савета міністраў абароны і камітэта сакратароў саветаў бяспекі краін Арганізацыі Дагавора аб калектыўнай бяспецы (АДКБ).

Размову ініцыяваў беларускі бок, гаворыцца ў паведамленні МЗС Арменіі.

Адзначаецца, што падчас размовы кіраўнікі знешнепалітычных ведамстваў дзвюх краін абмеркавалі таксама пытанні двухбаковага парадку дня.

15 лістапада армянскі прэм’ер-міністр Нікол Пашынян заявіў, што не прыбудзе ў Мінск 23 лістапада на сесію Савета калектыўнай бяспекі (СКБ) АДКБ, бо гэтая арганізацыя, нягледзячы на свае абавязацельствы, “не адрэагавала належным чынам на выклікі бяспекі Арменіі”.

Пашынян паведаміў пра гэта ў тэлефоннай размове з Аляксандрам Лукашэнкам.

Пазней ён падкрэсліў, што Арменія “шукае і знаходзіць” іншых саюзнікаў па бяспецы, таму што цяперашнія партнёры, “у тым ліку па аб’ектыўных прычынах, не маюць магчымасці прадаваць зброю і боепрыпасы”.

“Стратэгічна мы не збіраемся аб’яўляць аб змене палітыкі, пакуль не прымем рашэнне аб выхадзе з АДКБ”, — сказаў Пашынян.

Кіраўнік урада Арменіі неаднаразова крытыкаваў арганізацыю за тое, што яе ўдзельнікі не дапамаглі Ерэвану ва ўзброеным канфлікце з Азербайджанам вакол Нагорнага Карабаха.

21 лістапада сакратарыят АДКБ фактычна зняпраўдзіў апублікаваныя прэс-службай Аляксандра Лукашэнкі словы генеральнага сакратара арганізацыі Імангалі Тасмагамбетава аб адмове Арменіі ад дапамогі блока, заявіўшы аб працы над праектам пастановы СКБ АДКБ “Аб сумесных захадах дапамогі Рэспубліцы Арменія”.

Арганізацыя Дагавора аб калектыўнай бяспецы — ваенна-палітычны блок, мэтамі якога заяўлены “ўмацаванне міру, міжнароднай і рэгіянальнай бяспекі і стабільнасці, абарона на калектыўнай аснове незалежнасці, тэрытарыяльнай цэласнасці і суверэнітэту дзяржаў-членаў”. У яго ўваходзяць Арменія, Беларусь, Казахстан, Кыргызстан, Расія і Таджыкістан.

Шэраг экспертаў канстатуе крызіс у АДКБ, звязаны з тым, што прынцыпы забеспячэння калектыўнай бяспекі ўнутры аб’яднання не выконваюцца. Акрамя таго, Кыргызстан і Таджыкістан перыядычна абстрэльваюць адзін аднаго ў памежжы.

У АДКБ таксама няма адзінства ў пытанні вайсковай агрэсіі РФ супраць Украіны.