22 лістапада, Позірк. Вярхоўная Рада Украіны падтрымала рашэнне Равета нацыянальнай бяспекі і абароны (РНБА) ад 20 лістапада аб прымяненні сектаральных эканамічных санкцый супраць Беларусі і РФ у абаронна-прамысловай сферы.
Паводле інфармацыі дэпутата Яраслава Жалезняка, за прыняцце дакумента, які быў унесены прэзідэнтам Уладзімірам Зяленскім, прагаласавалі 304 парламентарыі (мандат маюць 424 дэпутаты).
Санкцыі ўводзяцца на 50 гадоў. Сярод іншага яны прадугледжваюць забарону на любыя аперацыі з рэзідэнтамі Беларусі і РФ (у тым ліку праз пасярэднікаў) па таварах ці паслугах, на якія распаўсюджваецца дзеянне закона “Аб дзяржаўным кантролі за міжнароднымі перадачамі тавараў ваеннага прызначэння і падвойнага выкарыстання”.
Спыняецца выкананне эканамічных і фінансавых абавязацельстваў на карысць рэзідэнтаў РФ і Беларусі па аперацыях з таварамі ваеннага прызначэння і падвойнага выкарыстання.
Рэзідэнтам гэтых краін забаронена перадаваць адпаведныя тэхналогіі, правы інтэлектуальнай уласнасці ды інш.
Уводзіцца забарона на рэгістрацыю і акрэдытацыю арганізацый калектыўнага кіравання, заснавальнікамі якіх з’яўляюцца рэзідэнты Беларусі і РФ. Дзеянне прамысловых праграм па таварах ваеннага або падвойнага прызначэння, якія выконваюцца пры з іх удзелам, спыняюцца. Забаронены прамыя і ўскосныя інвестыцыі ў дачыненні да беларускіх і расійскіх юрыдычных асоб, звязаных з вытворчасцю або перадачай тавараў ваеннага і двайнога прызначэння.
Рашэнне РНБА набыло моц.
Пасля пачатку вайны, у якой беларускія ўлады дапамагаюць Расіі, Украіна ўвяла некалькі пакетаў санкцый супраць Мінска.
