25 лістапада, Позірк. Інфармацыя Аб’яднанага пераходнага кабінета (АПК) пра тое, як рэжым Аляксандра Лукашэнкі абыходзіць санкцыі, 25 лістапада перададзеная віцэ-канцлеру ФРГ Роберту Хабеку, паведаміў “Позірку”галоўны дарадца беларускага дэмакратычнага лідара Святланы Ціханоўскай Франак Вячорка.
Сустрэча палітыкаў адбылася ў Карлсруэ, куды дэмлідар была запрошаная ў якасці выступоўцы на кангрэсе нямецкай партыі “Саюз 90/Зялёныя”. Хабек з’яўляецца яе сустаршынёй.
“Размаўлялі ў асноўным пра абыход санкцый, закрыццё пралазаў, паколькі ён жа (Хабек. – “Позірк”.) займаецца эканомікай — ён міністр эканомікі [і праблем клімату] у нямецкім урадзе, — сказаў Вячорка. — Казалі пра тое, каб закрыць пралазы, каб не здымаліся санкцыі супраць калійных угнаенняў. У рэзалюцыі бундэстага выразна гаворыцца, што нельга змякчаць санкцыі без прычын”.
“Размаўлялі пра падтрымку працы беларускіх экспертаў па накірунку “зялёнага курсу” і ўдзел дэмакратычнай Беларусі ў міжнародных мерапрыемствах на тэму экалогіі і аховы навакольнага асяроддзя, незалежнасці ад выкапнёвых рэсурсаў”, — дадаў ён.
Паводле слоў галоўнага дарадцы беларускага палітыка, Ціханоўская і Хабек абмеркавалі “сітуацыю з палітычнымі зняволенымі і саўдзелам Лукашэнкі ў вайне [РФ супраць Украіны]”, размаўлялі пра “дэлегітымацыю рэжыму Лукашэнкі”.
“Асобна размаўлялі пра падтрымку незалежных медыя, у прыватнасці пра павелічэнне фінансавання для беларускай службы Deutsche Welle”, — паведаміў Вячорка.
