Кіраўнік МУС запатрабаваў не дапусціць “правакацый і хаця б якой дэстабілізацыі” на будучых выбарах
1 снежня, Позірк. На будучых выбарах у Беларусі “нельга дапусціць правакацый і хаця б якой дэстабілізацыі абстаноўкі”, заявіў на калегіі Міністэрства ўнутраных спраў 1 снежня кіраўнік ведамства Іван Кубракоў.
“Мы павінны быць гатовыя да дзеянняў у асаблівых умовах! — цытуе чыноўніка прэс-служба МУС. — Гэта не толькі правядзенне вучэнняў і трэніровак, але і забеспячэнне неабходнай экіпіроўкай кожнага супрацоўніка, вайскоўца, а таксама якаснае абрыштаванне падраздзяленняў”.
Паводле яго слоў, супрацоўнікам МУС неабходна “ў межах кампетэнцыі” ўзяць непасрэдны ўдзел у падрыхтоўцы і правядзенні выбараў, а кіраўнікам — “забяспечыць жорсткую выканальніцкую дысцыпліну, максімальную скаардынаванасць дзеянняў з іншымі праваахоўнымі органамі і іншымі зацікаўленымі”.
У органах унутраных спраў “назапашаны багаты досвед працы пры правядзенні розных электаральных кампаній”, заявіў міністр. Разам з тым ён рэкамендаваў “не расслабляцца”, а “нарошчваць аператыўныя пазіцыі, а таксама надаваць належную ўвагу пытанням прафілактыкі правапарушэнняў”.
У сваю чаргу першы намеснік міністра — начальнік міліцыі грамадскай бяспекі Юрый Назаранка заявіў, што “выбары пройдуць паводле новых правіл, стануць маштабнай і далёка не лёгкай кампаніяй”.
“На працягу двух гадоў на базе Акадэміі МУС арганізоўваліся вучэбна-метадычныя зборы з прадстаўнікамі дзяржорганаў і ГУУС, УУС, уключанымі ў склад аператыўна-сітуацыйных штабоў, — сказаў ён. — З супрацоўнікамі АУС праведзеныя трэніроўкі па адпрацоўцы дзеянняў у асаблівых умовах, падвышэнні ўзроўню гатоўнасці да рэагавання на магчымыя пагрозы. Рэалізаваны задачы па адпрацоўцы першачарговых мер супрацьдзеяння дыверсійна-выведвальным групам і незаконным узброеным фарміраванням. Нямала зроблена для матэрыяльна-тэхнічнага абрыштавання падраздзяленняў, у тым ліку сродкамі абароны і актыўнай абароны, узбраеннем”.
Паводле слоў Назаранкі, участкі для галасавання абсталююць сістэмамі відэаназірання і сігналізацыі, арганізуюць кругласутачнае дзяжурства міліцыі. На вуліцах Мінска, абласных і раённых цэнтраў будуць дадатковыя патрульныя нарады і “групы хуткага рэагавання”.
Пасля прэзідэнцкіх выбараў 2020 года міліцыя адзначылася небывалай жорсткасцю ў дачыненні да ўдзельнікаў акцый пратэсту супраць фальсіфікацый, што яшчэ больш павялічыла маштаб народных выступаў. У выніку пратэсты былі падаўленыя, а ў краіне пачаліся масавыя рэпрэсіі, якія не сціхаюць дагэтуль.
У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя саветы. Адзіны дзень галасавання прызначаны на 25 лютага. На працягу 60 дзён пасля яго адбудзецца першае пасяджэнне Усебеларускага народнага сходу ў новым статуце.
Падчас выбараў будзе забаронена фатаграфаваць і выкладваць у інтэрнэт запоўнены бланк бюлетэня — як падчас датэрміновага галасавання, так і ў дзень выбараў. За парушэнне гэтага патрабавання пагражае адміністрацыйная адказнасць.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.