4 снежня, Позірк. Папраўкі да закона аб абмежавальных мерах, якія прапануюць выключыць магчымасць для новапрыбыўшых грамадзян Беларусі атрымліваць статус часовага рэзідэнта — часовы від на жыхарства, найбліжэйшым часам мае намер зарэгістраваць у сейме кіраўнік парламенцкага Камітэта па нацыянальнай бяспецы і абароне Лаўрынас Кашчунас, паведамляе LRT.
Паводле слоў Кашчунаса, заканадаўчыя змены арыентаваныя на тую групу беларусаў, якая “становіцца мішэнню службаў рэжыму” Аляксандра Лукашэнкі. Прыняцце паправак, мяркуе ён, “дапаможа знізіць пагрозы бяспецы як для Літвы, так і для беларускай апазіцыі” ў гэтай балтыйскай краіне.
“Вельмі важна падкрэсліць, што мы працягваем захоўваць гуманітарны калідор. То бок, калі гэта сапраўды праваабаронцы, людзі, якія падвяргаюцца рэпрэсіям з боку беларускага рэжыму, то Міністэрства замежных спраў зможа даць такі гуманітарны калідор. А для часовага рэзідэнцтва робім адно выключэнне — кваліфікаваная працоўная сіла”, — сказаў ён.
“Бачанне зразумелае — давайце падтрымліваць дэмакратычную Беларусь, давайце дадзім прытулак тым, хто мае патрэбу, давайце ўмацоўваць незалежнасць настолькі, наколькі гэта залежыць ад нас, але давайце не будзем ствараць Беларусь у Літве з усімі вынікаючымі рызыкамі — ці то літвінізм, ці ўсе пагрозы выведкі”, — дадаў парламентарый.
Начальнік Дэпартамента дзяржаўнай бяспекі (ДДБ) Літвы Дарус Яўнішкіс заявіў, што “восем з дзесяці” грамадзян Беларусі, якія жывуць у краіне, з’яўляюцца “эканамічнымі мігрантамі”, а “прадстаўнікі апазіцыі, якія актыўна апаніруюць рэжыму Лукашэнкі, складаюць толькі невялікую частку” беларускай дыяспары.
Паводле яго слоў, у гэтым крыецца “корань сур’ёзных пагроз”, паколькі “частка гэтых людзей ездзіць туды і назад, ездзіць з Літвы ў Беларусь” і ўяўляе цікавасць для беларускіх спецслужбаў.
Раней КНБА рэкамендаваў адхіліць прапанову міністра ўнутраных спраў Агне Білатайце пра павелічэнне для беларусаў тэрміну дзеяння ВНЖ з аднаго да трох гадоў.
