На дзесяці метэастанцыях у лістападзе абноўлены гістарычныя максімумы ападкаў – Белгідрамет

6 снежня, Позірк. Мінулы лістапад заняў трэцяе месца ў шэрагу самых вільготных апошніх месяцаў восені пачынаючы з 1945 года, паведамляе Белгідрамет.

У сярэднім па краіне выпала 85,6 мм ападкаў (85,6 л вады на квадратны метр тэрыторыі), што склала 187% кліматычнай нормы. На дзесяці метэастанцыях у Віцебскай, Мінскай, Магілёўскай і Гомельскай абласцях абноўлены гістарычныя максімумы сумы ападкаў за лістапад. У Сянно, Беразіно, Горках і Слаўгарадзе абноўлены гістарычныя сутачныя сумы.

Больш за ўсё ападкаў адзначана на тэрыторыі Гомельскай вобласці — у сярэднім 113,7 мм, або 250% нормы, менш за ўсё — у Брэсцкай вобласці — 57,1 мм, або 136% нормы.

У другой палове трэцяй дэкады ўсталявалася снежнае покрыва. 30 лістапада яно склала ад 1 см у Пружанах да 39 см у Езярышчы. Снегу не было толькі ў Гродне.

Сярэдняя тэмпература паветра сёлета ў лістападзе склала +1,9 градуса, што вышэй за кліматычную норму на 0,3°С. Перавышэнне нормы ў гэтым месяцы назіраецца з 2017 года.

Вельмі цёплай была першая дэкада са станоўчай анамаліяй роўнай 4 градусам. Сярэдняя тэмпература другой дэкады адпавядала норме, трэцяя дэкада была халоднай з адмоўнай анамаліяй роўнай 3 градусам.

Максімальнага значэння тэмпература паветра дасягнула 1 лістапада ў Гомелі (+16,7 градуса), мінімальнага — 28 і 29 лістапада ў Клічаве (-14,7).

Вегетацыйны перыяд завяршыўся на 15-20 дзён пазней, чым звычайна (устойлівы пераход сярэднясутачнай тэмпературы паветра праз +5 градусаў у бок паніжэння). Толькі на крайняй поўначы і паўночным усходзе гэты пераход здзейсніўся ў тэрміны, блізкія да звычайных (19—25 кастрычніка), адзначае Белгідрамет.

24 лістапада ў Гродне была зафіксавана навальніца. Максімальная хуткасць ветру за месяц была 27 лістапада ў Горках і Слаўгарадзе (21 м/с).