Ціханоўская павіншавала Украіну і Малдову з пачаткам перамоваў аб уступленні ў ЕС

14 снежня, Позірк. Святлана Ціханоўская павіншавала Украіну і Малдову з рашэннем Еўрапейскага саюза пачаць перамовы аб уступленні ў гэтае аб’яднанне.

Дзень 14 снежня яна назвала гістарычным. Беларускі дэмакратычны лідар павіншавала таксама Грузію з атрыманнем статусу кандыдата на ўступленне ў ЕС.

“Мы з нецярпеннем чакаем таго дня, калі беларусы таксама змогуць вярнуцца ў еўрапейскую сям’ю”, — напісала Ціханоўская ў “Твітары”.

Рашэнне па Украіне, Малдове, Грузіі, а таксама па Босніі і Герцагавіне (перамовы аб членстве пачнуцца пасля дасягнення неабходных крытэрыяў, застаецца кандыдатам) прынята на саміце ЕС у Бруселі.