Украіна спыняе дзеянне пагаднення з Беларуссю аб садзейнічанні і ўзаемнай абароне інвестыцый

15 снежня, Позірк. Кабінет міністраў Украіны ініцыюе спыненне дзеяння пагаднення з Беларуссю аб садзейнічанні і ўзаемнай абароне інвестыцый. Пра гэта паведаміў у сваім тэлеграм-канале прадстаўнік урада ў Вярхоўнай радзе Тарас Мельнічук.

Праект закона аб гэтым ухвалены на ўзроўні ўрада 15 снежня.

Пагадненне было заключана 14 снежня 1995 года ў Кіеве і набыло моц у чэрвені 1997 года.

Пасля пачатку поўнамаштабнай вайны ва Украіне, у якой Беларусь падтрымлівае Расію, Кіеў і Мінск скасавалі шэраг заключаных раней дагавораў аб двухбаковым супрацоўніцтве.