20 снежня, Позірк. У якасці асновы для правядзення перамоў ухвалены праект пагаднення аб свабодным гандлі паміж Еўразійскім эканамічным саюзам (ЕАЭС) і яго членамі з аднаго боку і Іранам з другога боку, вынікае з указа № 390, падпісанага Аляксандрам Лукашэнкам 18 снежня.
У адпаведнасці з дакументам, апублікаваным на Нацыянальным прававым інтэрнэт-партале 20 снежня, правесці перамовы па праекту, пры неабходнасці ўнесці ў яго непрынцыповыя змены і ў выніку падпісаць упаўнаважаны Савет міністраў.
Пагадненне аб зоне свабоднага гандлю з ЕАЭС раней падпісалі В’етнам, Сербія і Сінгапур. У працэсе перамоў знаходзяцца Егіпет, Манголія, ААЭ, Тайланд.
Дэмакратычныя краіны адкрыта абвінавачваюць Тэгеран у дапамозе расійскай агрэсіі супраць Украіны. Першапачаткова гаворка ішла пра пастаўкі Маскве іранскіх дронаў-камікадзэ, цяпер — пра наладжванне іх вытворчасці на расійскай тэрыторыі. Паводле даных асобных крыніц, разглядалася пытанне вырабу іранскіх беспілотнікаў у Беларусі.
ЕАЭС — арганізацыя рэгіянальнай эканамічнай інтэграцыі, якая мае міжнародную правасуб’ектнасць. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), а таксама Арменія (з 2 студзеня 2015 года) і Кыргызстан (з 12 жніўня 2015 года).
