У Беларусі спажыванне электрычнасці ў 2023 годзе перасягне мінулагодні ўзровень на 6,3% — прагноз Мінэнерга

20 снежня, Позірк. У 2023 годзе агульны аб’ём спажывання электраэнергіі ў Беларусі складзе 41 млрд кілават-гадзін — на 6,3% больш, чым было ў 2022-м (38,572 млрд кВт·г), вынікае з прагнозу, прадстаўленага на прэс-канферэнцыі 20 снежня ў Мінску міністрам энергетыкі Віктарам Каранкевічам.

Паводле яго слоў, якія перадае прэс-служба ведамства, каля 28% агульнага аб’ёму спажывання “плануецца забяспечыць за кошт выпрацоўкі электраэнергіі на БелАЭС”.

Каранкевіч заявіў, што электрычнасць, якая генеруецца на Беларускай АЭС, “шырока выкарыстоўваецца для электрыфікацыі жыллёвага фонду”. Ён адзначыў, што ў “цяперашняй пяцігодцы” павінна быць уведзена ў эксплуатацыю каля 2 млн кв. м “новых шматкватэрных электрадамоў”.

Акрамя таго, паводле слоў чыноўніка, ужо існуючыя шматкватэрныя дамы, для абслугоўвання якіх выкарыстоўвалася цвёрдае паліва, пераводзяць на электраэнергію: “Складзены адпаведныя графікі на пяцігодку, у іх уключаны каля 100 такіх дамоў у розных рэгіёнах краіны, з іх ужо мадэрнізаваныя 19”.

Збудаванне БелАЭС ля Астраўца (Гродзенская вобласць) завяршылася ўвосень 2023 года. Станцыя пабудаваная паводле расійскага праекта, генеральным падрадчыкам выступіла дзяржаўная карпарацыя “Расатам”.

Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня гэтага года. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.