Украіна працягвае абсталёўваць абарончыя пазіцыі на мяжы з Беларуссю

22 снежня, Позірк. Украіна працягвае абсталёўваць абарончыя пазіцыі на мяжы з Беларуссю, вынікае з паведамлення камандавання Аб’яднаных сіл украінскіх Узброеных сіл (АС УСУ).

“Мы разумеем, што наша паўночная мяжа павінна быць максімальна ўмацаваная, – заявіў камандуючы АС УСУ Сяргей Наеў. — Цяпер сітуацыя на гэтым участку стабільная і кантраляваная. Гэта дае нам час і магчымасць зрабіць захады па падрыхтоўцы дадатковых фартыфікацыйных умацаванняў, прызначаных для дадатковых сіл, якія ў далейшым могуць быць перададзеныя на гэты напрамак у выпадку імклівага абвастрэння сітуацыі”.

Украінскія войскі абсталёўваюць камандныя вышыні, ствараюцца “батальённыя рубяжы абароны, якія складаюцца з ротных і ўзводных апорных пунктаў”. На палях вайсковыя інжынеры пракопваюць траншэі, супрацьтанкавыя равы, усталёўваюць загараджальныя тэтраэдры і расцягваюць калючы дрот.

За тыдзень да гэтага Наеў паведаміў, што Украіна займаецца абсталяваннем першай і другой ліній абароны на мяжы з Беларуссю.

Напрыканцы кастрычніка камандуючы АС УСУ заяўляў, што ў прыграніччы з Украінай знаходзіцца 1,8 тыс беларускіх вайскоўцаў.

Паводле яго слоў, каб апраўдаць прысутнасць вайскоўцаў у прыграніччы, Беларусь пастаянна праводзіць трэніроўкі на размешчаных там палігонах.