З 2020 года БФСС накіраваў на падтрымку беларускіх спартсменаў больш за 500 тыс. еўра
27 снежня, Позірк. З 2020 па 2023 год на падтрымку “спартсменаў, якія пацярпелі за сваю грамадзянскую пазіцыю, звольненых і вымушаных пакінуць” краіну, Беларускі фонд спартыўнай салідарнасці (БФСС) накіраваў больш за 500 тыс. еўра, гаворыцца ў апублікаванай 27 снежня справаздачы арганізацыі пра працу, праведзеную за гэтыя гады.
Згодна з дакументам, у 2021 годзе БФСС правёў шэсць навучальна-трэніровачных збораў для падрыхтоўкі “беларускіх свабодных спартсменаў” да Алімпійскіх гульняў і іншых спартыўных падзей. У тым жа годзе фонд прафінансаваў восем паездак спартсменаў на алімпійскія кваліфікацыйныя спаборніцтвы з прычыны таго, што “праз іх грамадзянскую пазіцыю” не было падтрымкі ад НАК Беларусі і нацыянальных федэрацый.
БФСС, гаворыцца ў справаздачы, спрыяў “юрыдычнай дапамозе беларускім атлетам, прафесійным спартсменам і грамадскім актывістам”, у выніку чаго ім было выдадзена больш за 200 гуманітарных віз, зарэгістравана 20 выпадкаў надання міжнароднай абароны ў Польшчы, Літве, Германіі, Нарвегіі ды іншых краінах Еўропы.
Акрамя таго, фонд накіраваў больш за 100 тыс. еўра на падтрымку ўкраінскіх спартсменаў, каб “дапамагчы ім працягнуць спартыўную кар’еру падчас вайны”; правёў серыю аўкцыёнаў “Сусветны спорт для Украіны”, на якіх было сабрана больш за 150 тыс. еўра для набыцця і дастаўкі гуманітарнай дапамогі.
У бліжэйшы час БФСС мае намер апублікаваць сваю фінансавую справаздачу за 2020–2023 гады.
Беларускі фонд спартовай салідарнасці быў заснаваны функцыянерамі і атлетамі ў адказ на падзеі пасля прэзідэнцкіх выбараў 2020 года. Займаецца падтрымкай спартсменаў, якія падвергліся пераследу, і абаронай іх правоў. КДБ прызнаў яго “экстрэмісцкім фарміраваннем”.
26 снежня 2022 года Мінскі гарадскі суд у рамках спецвытворчасці завочна асудзіў на 12 гадоў пазбаўлення волі сузаснавальнікаў БФСС трохразовага прызёра Алімпійскіх гульняў Аляксандру Герасіменю (кіравала фондам да красавіка 2022 года, пакінула фонд праз рознагалоссі з калегамі) і былога дырэктара “Віцязь-Леон” Аляксандра Апейкіна.