Долар, еўра і юань патаннелі на апошніх у 2023 годзе таргах (абноўлена)

З улікам рашэння Беларускай валютна-фондавай біржы не праводзіць таргі ў апошні працоўны дзень года актуалізаваны загаловак, тыднёвая статыстыка, дададзена паведамленне БВФБ.

28 снежня, Позірк. Амерыканская, адзіная еўрапейская і кітайская валюты патаннелі на таргах Беларускай валютна-фондавай біржы 28 снежня.

Каціроўка долара знізілася да 3,1775 рубля (-0,0178, -0,56%), еўра — да 3,52 (-0,0004, -0,01%), юаня — да 4,4414 за 10 (-0,0179, -0,4%).

Расійскі рубель падаражэў да 3,4991 за 100 (+0,016, 0,46%).

Гэтыя таргі сталі апошнімі ў 2023 годзе. У пятніцу, 29 снежня, яны адменены рашэннем кіраўніцтва біржы — “у мэтах завяршэння не пазней за 29.12.2023 разлікаў па здзелках, праведзеных на таргах замежнымі валютамі ў ААТ “Беларуская валютна-фондавая біржа”, з улікам непрацоўных дзён у краінах месцазнаходжання банкаў-карэспандэнтаў”.

Такім чынам, на гэтым працоўным тыдні (25-29 снежня) каціроўка долара знізілася на 0,81% (з 3,2036 да 3,1775), юаня — на 0,88% (з 4,4810 да 4,4414 за 10). Еўра падаражэў на 0,03% (з 3,5191 да 3,5200), расійскі рубель — на 0,56% (з 3,4797 да 3,4991 за 100).

Афіцыйны курс долара ў Беларусі за студзень — лістапад 2023 года павялічыўся на 13,82% (з 2,7364 да 3,1145 рубля). Гэта другі паказчык на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў на 31 снежня 2022 года і 30 лістапада 2023-га. На першым месцы Расія — 26,37% (з 70,3375 да 88,8841 рубля).

У студзені афіцыйны курс долара да беларускага рубля знізіўся на 3,27% (да 2,6468 рубля); за студзень — люты — вырас на 2,62% (да 2,808), студзень — сакавік — на 4,41% (да 2,8571), студзень — красавік — на 6,91% (да 2,9255), студзень — травень — на 6,8% (да 2,9226), студзень — чэрвень — на 10,88% (да 3,0315), студзень — ліпень — на 10,58% (да 3,0258), студзень — жнівень — на 17,44% (да 3,2135), студзень — верасень — на 20,12% (да 3,2870), студзень — кастрычнік — на 16,79% (да 3,1958).

Па выніках 2022 года Беларусь заняла трэцяе месца на тэрыторыі былога СССР па росце афіцыйнага курсу долара (+7,39%).