Дарадца Наўседы пра беларускіх імігрантаў: Мы патэнцыйна ствараем пятую калону
2 студзеня, Позірк. З крытыкай рашэння сейма Літвы, які адмовіўся зраўняць умовы легалізацыі для грамадзян РФ і Беларусі, выступіў дарадца прэзідэнта краіны Фрэдэрыкас Янсанас 2 студзеня ў інтэрв’ю Žinių radijas.
“Я лічу, сапраўды важны момант — гэта тое, у чым сейм памыліўся. Стаўка на ўніфікацыю ўмоў пражывання і перамяшчэння ў Літве для расіян і беларусаў была адхілена, цяпер праз паўгода мы вяртаемся да праблем. ⟨…⟩ Дэпартамент дзяржбяспекі сігналізуе, што праблема ў тым, што кожны месяц у Літву прыязджаюць тысячы і тысячы новых жыхароў з Беларусі. І мы стваралі патэнцыйна вялікую праблему”, — сказаў ён.
“За год, наколькі я магу меркаваць, у Літву прыязджае 20 тыс. новых людзей [з Беларусі]. Я не ведаю, каго яны прадстаўляюць ⟨…⟩. Мы патэнцыйна ствараем пятую калону і прадстаўляем, што тут усё добра і прыгожа, але гэта не так”, — дадаў Янсанас.
26 снежня сейм Літвы адобрыў папраўкі да закона аб прававым статусе іншаземцаў, якія сярод іншага дазволяць выдаваць беларусам, якія прыбылі краіну пры пасрэдніцтве МЗС, від на жыхарства па гуманітарных прычынах не на адзін, а на тры гады.
Закон адпраўлены на подпіс прэзідэнту Гітанасу Наўседзе.
Прапанова павялічыць тэрмін дзеяння гуманітарнага ВНЖ да трох гадоў унесла міністр унутраных спраў Літвы Агне Білатайце. Яна аргументавала гэта тым, што адпаведны дакумент выдаецца ў асноўным грамадзянам Беларусі, якія ратуюцца ад рэжыму Аляксандра Лукашэнкі. Сітуацыя ў краіне “працяглы час не мяняецца”, беларусы “не могуць вярнуцца на радзіму пасля заканчэння года і вымушаны падаваць новую заяўку” на ВНЖ. На думку міністра, павелічэнне тэрміну дзеяння гэтага дакумента дазволіла б пазбегнуць нязручнасцей, выкліканых неабходнасцю часта яго мяняць, а Дэпартамент міграцыі пры МУС зэканоміў бы адміністрацыйны рэсурс на апрацоўку заяў.
Камітэт сейма па нацыянальнай бяспецы і абароне, які ўзначальвае дэпутат Лаўрынас Кашчунас, выступіў супраць гэтай прапановы, камітэт па замежных справах гэтыя папраўкі падтрымаў.
4 снежня Кашчунас, яго калега Аўдронюс Ажубаліс, а таксама намеснік старшыні парламента Паўлюс Саўдаргас зарэгістравалі законапраект, які прадугледжвае абмежаванне выдачы беларусам часовага віду на жыхарства.
