Туск: Польшча зробіць усё, каб ахова мяжы была эфектыўнай і жорсткай, і адначасова не парушаліся правы чалавека
4 студзеня, Позірк. “Мы зробім усё, каб ахова межаў была эфектыўнай і жорсткай, калі гэта неабходна, і ў той жа час каб не парушаліся асноўныя гуманітарныя правы чалавека. Асабліва, калі гаворка ідзе пра самых слабых”, — заявіў прэм’ер-міністр Польшчы Дональд Туск на прэс-канферэнцыі па выніках пасяджэння ўрада, якое прайшло 3 студзеня.
Заява была зроблена ў адказ на пытанне аб практыцы “незаконных выцясненняў на польска-беларускай мяжы” ў адпаведнасці з распараджэннем былога намесніка міністра ўнутраных спраў і адміністрацыі Мацея Вонсіка.
Паводле слоў Туска, “ёсць грань паміж тым, што з’яўляецца неабходным дзеяннем памежнай службы, каб перашкодзіць людзям [нелегальна] перасякаць нашу мяжу,<…>, і дзеяннямі, якія многімі будуць лічыцца жорсткімі або супрацьзаконнымі”.
Кіраўнік польскага ўрада заявіў пра намер шукаць рашэнні, якія аддадуць прыярытэт абароне межаў і абмяжуюць “пакуты людзей”, у тым ліку тых, хто хоча трапіць у краіну. Пры гэтым ніводная з такіх пастаноў “не павінна заахвочваць або палягчаць незаконны ўезд у Польшчу”.
Прэм’ер заявіў пра намер у бліжэйшы час наведаць усходнюю мяжу, каб пагутарыць, у тым ліку, з прадстаўнікамі пагранслужбы.
З пачатку 2024 года Польшча прадухіліла 23 спробы нелегальнага перасячэння мяжы з боку Беларусі, у 2023 годзе іх было 25.571, што ў 1,6 разы перавысіла аналагічны паказчык 2022 года.
Статыстыка, выведзеная “Позіркам” на падставе штодзённых звестак, сведчыць, што напружанасць на мяжы Беларусі і краін ЕС вагаецца, да канца 2023 года яна прыкметна знізілася, аналагічная тэндэнцыя назіраецца і ў пачатку 2024-га.
Міграцыйны крызіс на мяжы Беларусі і краін ЕС пачаўся вясной 2021 года.
