У Расіі загарэўся чарговы аўтобус, выраблены МАЗ “ва ўмовах санкцыйнага ціску”
4 студзеня, Позірк. У Санкт-Пецярбургу 3 студзеня загарэўся аўтобус, выраблены на Мінскім аўтамабільным заводзе, паведамляе выданне “Фонтанка”.
Паводле інфармацыі медыя, аўтобус, які належыць кампаніі “Домтрансаўта”, загарэўся на вуліцы Руставелі.
“Адбылося ўзгаранне адпрацаваных газаў. У гэты момант пасажыраў у салоне не было. З няштатнай сітуацыяй кіроўца справіўся пры дапамозе вогнетушыцеля. МНС не выклікалі”, — удакладнілі ў кампаніі.
Гэта не першы выпадак узгарання ў Расіі пасажырскага транспарту МАЗ за апошнія месяцы.
Усяго, паводле дадзеных расійскіх СМІ, у Пецярбургу ў 2023 годзе загарэлася не менш за дзевяць аўтобусаў беларускай вытворчасці. Годам раней зафіксавана 8 падобных выпадкаў.
Як паведамляла прэс-служба Пецярбургскага дзяржаўнага ўнітарнага прадпрыемства “Пасажыраўтатранс”, 2 жніўня 2023 года ў горадзе была прыпыненая эксплуатацыя партыі аўтобусаў МАЗ. Іх адмаўляліся ставіць на баланс, “пакуль не будуць ліквідаваныя прычыны” ўзгаранняў.
“У сувязі з наяўнасцю заўваг, якія патэнцыйна могуць прывесці да ўзгарання аўтобусаў, прынята рашэнне аб прыпыненні эксплуатацыі на гарадской маршрутнай сетцы 137 аўтобусаў Мінскага аўтамабільнага завода (МАЗ 203047). Яны паступілі ў Пецярбург паводле кантрактаў 2022 года”, — паведамляла прэс-служба ГУП “Пасажыраўтатранс”.
У адказ на запыт віцэ-губернатара Санкт-Пецярбурга Кірыла Палякова ў чэрвені 2022 МАЗ паведаміў, што прычынай узгаранняў можа быць “трапленне алею з сістэмы гідрапрывада вентылятара на гарачыя часткі рухавіка”.
“Ва ўмовах санкцыйнага ціску і парушэння лагістычных ланцужкоў пры пастаўках камплектаў гідрапрывада магла адбыцца замена правераных фланцаў на іншыя, аналагічныя па тэхнічных характарыстыках, але якія не маюць правераных рэферэнцый <…>, — удакладніў Палякоў. — Усе яны будуць прэвентыўна замененыя. Усе наступныя пастаўкі пасажырскай тэхнікі па існуючых кантрактах будуць дадаткова правераны перад адгрузкай на прадмет магчымых уцечак працоўных вадкасцяў сістэмы гідрапрывада з адлюстраваннем дадзенага параметру ў пратаколе прыёмаздатачных выпрабаванняў”.
Наяўнасць праблемы з беларускімі аўтобусамі ўскосна прызнаў Аляксандр Лукашэнка, які заявіў 19 верасня мінулага года на сустрэчы з губернатарам Краснадарскага краю Веніямінам Кандрацьевым, што прычына ўзгаранняў пасажырскага транспарту ў Пецярбургу крыецца ў адсутнасці “якаснага і своечасовага абслугоўвання” і прапанаваў наладзіць тэхабслугоўванне на месцы сіламі беларускіх рамонтнікаў.
“А чаму ў Піцеры [МАЗы] гараць? Таму што нейкая прыватная кампанія, людзі, якія ніколі не бачылі аўтобусаў, узяла на сябе абслугоўванне, — сказаў Лукашэнка. — Натуральна, дзесьці ўцечкі, працечкі і гэтак далей. Нешта дзесьці задымілася, у СМІ адразу: “Ах, загарэлася!” Таму калі няма людзей, якія надзейна могуць абслугоўваць тэхніку, мы гэта лепш зробім самі”.
У лістападзе 2023 года на расійскім рынку прададзена 52 новыя аўтобусы Мінскага аўтамабільнага завода — у тры разы больш, чым у кастрычніку (17), сведчаць дадзеныя агенцтва “Аўтастат Інфа” (РФ).
У гадавым вымярэнні продажы выраслі ў 5,2 раза — у лістападзе 2022 года ў РФ было рэалізавана ўсяго 10 беларускіх аўтобусаў.
У мінулым месяцы МАЗ заняў 7-е месца ў адпаведным сегменце аўтарынка Расіі (у лістападзе 2022-га — 10‑е).
Па выніках 11 месяцаў на рынку РФ рэалізавана 799 аўтобусаў гэтага беларускага вытворцы — на 16,1% менш, чым за аналагічны перыяд мінулага года (952).
Еўрапейскія санкцыі супраць БелАЗа і МАЗа былі ўведзеныя ў чэрвені 2021 года пасля прымусовага прызямлення самалёта RyanAir у Мінску з Раманам Пратасевічам на борце.
24 сакавіка аб новых санкцыях абвясцілі Міністэрства фінансаў Злучаных Штатаў Амерыкі і дзяржаўны сакратар ЗША Энтані Блінкен.
У сакавіку 2023 года Казначэйства ЗША паведаміла аб увядзенні абмежавальных мер у дачыненні да Мінскага аўтазавода і яго кіраўніка Валерыя Іванковіча.