The Wall Street Journal: Расійская ядзерная зброя можа размяшчацца на авіябазе “Ліда”
8 студзеня, Позірк. Авіябаза “Ліда” (Гродзенская вобласць), якая размешчана за 40 кіламетраў ад мяжы з Літвой і з’яўляецца адзіным месцам дыслакацыі самалётаў Су-25 беларускіх ВПС, з’яўляецца “найбольш верагоднай” лакацыяй для размяшчэння расійскай тактычнай ядзернай зброі (ТЯЗ). Пра гэта паведаміла выданне The Wall Street Journal (ЗША) са спасылкай на звесткі Федэрацыі амерыканскіх навукоўцаў, якая прааналізавала разведвальныя звесткі з адкрытых крыніц, у тым ліку відэаматэрыялы Міністэрства абароны Беларусі.
У кастрычніку мінулага года гэта ж медыя на аснове аналізу спадарожнікавых здымкаў і матэрыялаў беларускіх дзяржСМІ, у прыватнасці, “ВаенТВ” і АНТ, паведаміла, што расійскае ТЯЗ можа захоўвацца на адной з пляцовак Асіповіцкага раёна (Магілёўская вобласць).
25 снежня 2023 года Аляксандр Лукашэнка, адказваючы ў Санкт-Пецярбургу на пытанні журналістаў перад пасяджэннем Вышэйшага Еўразійскага эканамічнага савета заявіў, што ТЯЗ дастаўлена з Расіі ў Беларусь “даўно”, “апошняя пастаўка” адбылася ў пачатку кастрычніка.
Аналізуючы гэты факт, The Wall Street Journal падкрэслівае, што заява Лукашэнкі з’явілася ў той час, калі Расія ўзмацняе свае пагрозы на адрас Захаду. Выданне спасылаецца на словы прэзідэнта РФ Уладзіміра Пуціна, які заявіў, што “будуць праблемы” з Фінляндыяй пасля таго, як НАТО “ўцягнула” Хельсінкі ў альянс. Прыводзіцца таксама заява намесніка старшыні Савета бяспекі Расіі Дзмітрыя Мядзведзева аб тым, што Польшча з’яўляецца “ворагам”, які можа страціць сваю дзяржаўнасць. “Правакацыйны ядзерны крок Пуціна ў Беларусі з’яўляецца напамінам пра тое, што стаіць на коне ва Украіне”, — адзначаюць у WSJ.
У даведцы МЗС РФ, падрыхтаванай да сумеснага пасяджэння калегій знешнепалітычных ведамстваў дзвюх краін 15 снежня 2023 года ў Маскве, адзначалася, што рашэнне Пуціна і Лукашэнкі размясціць у Беларусі расійскую ТЯЗ стала “скаардынаваным адказам на эскалацыю пагроз з боку дзяржаў — членаў НАТО, якія працягваюць сцягваць істотныя баявыя сілы да заходніх межаў Саюзнай дзяржавы”.
На сустрэчы з Пуціным 25 чэрвеня 2022 года ў Санкт-Пецярбургу Лукашэнка заявіў, што беларускія ўлады “вельмі турбуюць пытанні трэніровачных палётаў ЗША, і самалётаў натаўскіх, якія трэніруюцца несці ядзерныя боегалоўкі і ядзерныя зарады”.
“Таму я прашу вас разгледзець пытанне “люстранога адказу” на гэтыя рэчы, без перабору, — сказаў ён. — Яны трэніруюцца несці ядзерныя боегалоўкі, вы, калі ласка, дапамажыце нам хоць бы прыстасаваць самалёты нашы, якія ў нас ёсць (Су-35, па-мойму, так), якія могуць несці ядзерныя зарады. Я не кажу пра тое, што заўтра вы перавязеце туды ядзерныя боепрыпасы, але жартаваць нам нельга”.
17 верасня мінулага года намеснік дзяржсакратара Савета бяспекі Беларусі Павел Муравейка ў эфіры тэлеканала СТБ заявіў, што беларускія вайскоўцы маюць адпаведную падрыхтоўку для выкарыстання ядзернай зброі. Спецыялісты, сказаў Муравейка, “прайшлі пэўны кантрольны зрэз і допуск, атрымаўшы магчымасць выкарыстоўваць і ўжываць гэтую зброю”.