Затрыманы народны майстар Беларусі Юрась Камандзірчык
11 студзеня, Позірк. Затрыманы народны майстар Беларусі, разьбяр па дрэве Юрась Камандзірчык.
Сілавікі прыйшлі да яго дадому, паведаміла “Позірку” крыніца на ўмовах ананімнасці.
Паводле крыніцы, майстар з’язджаў за мяжу на працу і вярнуўся ў Беларусь, каб аформіць пенсію. Сам Камандзірчык напісаў пра вяртанне ў “Фэйсбуку” напрыканцы 2023 года.
Падставы затрымання невядомыя.
62-гадовы Юрась Камандзірчык — сябра Саюза народных майстроў, у 2021 годзе атрымаў званне “Народны майстар”. Пражывае ў Мядзелі (Мінская вобласць).
Ён адзін з аўтараў мемарыяльнага крыжа беларускаму дзеячу Вацлаву Ластоўскаму на месцы масавага пахавання ахвяр сталінскіх рэпрэсій ва ўрочышчы Курапаты пад Мінскам, ягоныя працы размешчаныя ў розных месцах Беларусі.
