У 2023 годзе ў Беларусі затрымана не менш за 10 каталіцкіх святароў, гэта другі паказчык у свеце
Генрых Акалатовіч
14 студзеня, Позірк. Не менш за 10 каталіцкіх святароў затрымана ў Беларусі ў 2023 годзе. Такія дадзеныя прыводзіць міжнародная дабрачынная каталіцкая арганізацыя “Дапамога царкве ў патрэбе”.
Паведамляецца, што трое з дзесяці беларускіх святароў застаюцца ў няволі.
Усяго арганізацыі вядома пра 132 прадстаўнікоў каталіцкай царквы, затрыманых, выкрадзеных або забітых у 2023 годзе.
Беларусь у агульным спісе займае другое месца — пасля Нікарагуа, дзе летась было затрымана не менш за 46 служыцеляў касцёла.
Ганенні на нелаяльных святароў, у тым ліку каталіцкіх, працягваюцца ў Беларусі з 2020 года.
У сярэдзіне лістапада мінулага года быў затрыманы і абвінавачаны ў “здрадзе дзяржаве” (ч.1 арт. 356 Крымінальнага кодэкса) пробашч касцёла св. Язэпа ў Валожыне (Мінская вобласць) Генрых (Генадзь) Акалатовіч.
Паводле інфармацыі ініцыятывы “Хрысціянская візія”, з 2020 года па сярэдзіну жніўня 2023-га тым ці іншым формам рэпрэсій у краіне падвергнулася не менш за 60 царкоўных служыцеляў: праваслаўных — 19, рымска-каталіцкіх — 22, грэка-каталіцкіх — 5, пратэстанцкіх — 14.
