16 студзеня, Позірк. На пасяджэнні Савета бяспекі Беларусі 16 студзеня яго члены маюць намер зацвердзіць Канцэпцыі нацыянальнай бяспекі і Ваеннай дактрыны, паведамляе прэс-служба Аляксандра Лукашэнкі.
“Ключавыя напрамкі трансфармацыі сучасных рызык, выклікаў і пагроз у сферы нацыянальнай бяспекі даволі падрабязна выкладзены ў канцэпцыі і Ваеннай дактрыне”, — канстатаваў Лукашэнка.
Кажучы пра сітуацыю на Блізкім Усходзе, ён адзначыў, што “гэта — найстрашэнная гуманітарная катастрофа”: “Звярніце ўвагу, што пагрозы прымянення ядзернай зброі загучалі практычна адразу пасля эскалацыі канфлікту. І, як гэта звычайна бывае, з боку “цывілізаванага” Захаду ніякіх санкцый не было. Дзяжурныя заявы, нібыта нічога не адбылося. На жаль, мы вярнуліся ў часы, калі вайсковая сіла стала галоўным аргументам пры выбудоўванні міждзяржаўных адносін”.
Што датычыцца праекта новай Ваеннай дактрыны, то ў ім у “поўным аб’ёме ўлічаны кардынальныя змяненні ў ваенна-палітычнай абстаноўцы, новыя ваенныя небяспекі”, сказаў ён.
Рашэнне аб распрацоўцы праекта новай Ваеннай дактрыны было прынята пасля адабрэння новай рэдакцыі Канцэпцыі нацбяспекі ў лютым 2023 года.
У дакуменце раскрыта змест ваеннай палітыкі краіны. У прыватнасці, сцвярджаецца, што “Беларусь — міралюбівая краіна, нікому не пагражае, але спробы ўмяшання ва ўнутраныя справы, а тым больш пагроза прымянення ваеннай сілы або агрэсія будуць спыняцца з выкарыстаннем усяго патэнцыялу дзяржавы”.
Пасля адабрэння Саветам бяспекі праектаў канцэпцыя і дактрына будуць вынесены на зацвярджэнне Усебеларускага народнага сходу.
