Амбасадар Венгрыі ўручыла Алейніку копіі даверчых грамат, чым выклікала крытыку АПК

14 верасня, Позірк. Амбасадар Венгрыі Зіта Ілона Бенчык 14 верасня ўручыла копіі даверчых грамат міністру замежных спраў Сяргею Алейніку, паведамляе прэс-служба беларускага знешнепалітычнага ведамства.

Адзначаецца, што бакі таксама абмеркавалі “стан і перспектывы развіцця двухбаковых стасункаў, актуальныя пытанні міжнароднага парадку дня”.

“Суразмоўцы пацвердзілі гатоўнасць да працягу ўзаемапаважлівага дыялогу і далейшага нарошчвання супрацоўніцтва ў сферах узаемнай цікавасці”, — гаворыцца ў паведамленні.

На гэты факт прадстаўнік Аб’яднанага пераходнага кабінета (АПК) па замежных справах Валер Кавалеўскі адрэагаваў рэзкай крытыкай.

“МЗС Венгрыі туліцца да ўзурпатара, які мае дачыненне да шматлікіх злачынстваў, застаючыся адзінай белай варонай, што падкрэслівае салідарную пазіцыю ЕС наконт нелегітымнасці [Аляксандра] Лукашэнкі. Сутнасць ЕС заключаецца ў каштоўнасцях, прынцыпах і адзінстве. Беларусь будзе праводзіць менавіта такую знешнюю палітыку”, — напісаў ён у “Твітары”.

Пасля сфальсіфікаваных прэзідэнцкіх выбараў у Беларусі ў 2020 годзе і падаўлення масавых пратэстаў дзяржавы — члены Еўрасаюза перасталі дасылаць у Мінск новых паслоў.

Венгрыя застаецца адзінай краінай ЕС, якая падтрымлівае публічныя кантакты з афіцыйным Мінскам. Як член саюза яна была вымушана далучыцца да санкцый у дачыненні да рэжыму Лукашэнкі, але прадстаўнікі венгерскіх уладаў неаднаразова заяўлялі, што не падтрымліваюць іх увядзенне.

13 лютага Мінск наведаў кіраўнік МЗС Венгрыі Петэр Сіярта. Ён правёў перамовы з Алейнікам, а таксама міністрам эканомікі Аляксандрам Чарвяковым.

У тым жа месяцы была падпісана праграма супрацоўніцтва паміж МЗС на 2023 год, якая прадугледжвае “працяг дыялогу, комплекс мер па стымуляванні эканамічнага супрацоўніцтва, адукацыйных і культурных абменаў”.

20 жніўня Лукашэнка, віншуючы прэзідэнта Венгрыі Каталін Новак з Днём святога Іштвана (Днём заснавання дзяржавы), заявіў, што падабенства падыходаў Беларусі і Венгрыі да “першачарговасці нацыянальных інтарэсаў, неабходнасці абароны сям’і і традыцыйных каштоўнасцяў” будзе садзейнічаць супрацоўніцтву дзвюх краін.

Венгрыя ўваходзіць у топ-30 гандлёвых партнёраў Беларусі. У 2021 годзе двухбаковы тавараабарот склаў 231,5 млн долараў (беларускі экспарт — 89,8 млн). Актуальных даных у адкрытым доступе няма.