17 студзеня, Позірк. Праверка танкавага батальёна адной з механізаваных брыгад Заходняга аператыўнага камандавання пачалася на распараджэнне начальніка Генеральнага штаба Віктара Гулевіча.
Прэс-служба Міністэрства абароны паведаміла 17 снежня, што плануецца ацаніць “гатоўнасць асабовага складу вайсковай часці да выканання задач па прызначэнні”, а таксама “стан узбраення, вайсковай і спецыяльнай тэхнікі да наступнага прымянення”.
Такія мерапрыемствы ў Беларусі праводзяцца рэгулярна. 15 снежня 2023 года ваеннае ведамства абвясціла пра раптоўную праверку дзяжурных сіл супрацьпаветранай абароны, 4 снежня — пра планавыя заняткі па баявой гатоўнасці.
15 студзеня стала вядома, што беларускія вайскоўцы “пройдуць навучанне” на тэрыторыі Расіі, каб пераняць “досвед, набыты Узброенымі сіламі Расіі падчас вядзення спецыяльнай ваеннай аперацыі”. Тэрмінам “спецыяльная ваенная аперацыя” расійскія і беларускія ўлады называюць поўнамаштабную вайну супраць Украіны, развязаную РФ у лютым 2022 года.
