Памежны камітэт: Украіна ўладкоўвае абарончыя пазіцыі ў пунктах пропуску з Беларуссю

23 студзеня, Позірк. Абстаноўка на мяжы Беларусі з Украінай “параўнальная з леташняй”, заявіў 23 студзеня старшыня Дзяржаўнага памежнага камітэта (ДПК) Канстанцін Моластаў па выніках нарады Аляксандра Лукашэнкі з прадстаўнікамі сілавых ведамстваў.

Паводле слоў Моластава, якія перадае прэс-служба ДПК, з боку Украіны адбываецца “ўладкаванне абарончых пазіцый, у тым ліку ў пунктах пропуску, якія цяпер не дзейнічаюць, а таксама глыбока эшаланаванае размяшчэнне ўзбуйненых памежных нарадаў”.

“Асноўнае даручэнне для органаў памежнай службы — надзейная ахова дзяржаўнай мяжы ў створаных умовах у нашай памежнай прасторы”, — сказаў Моластаў, падкрэсліўшы, што ва ўзаемадзеянні з Міністэрствам абароны, КДБ, Міністэрствам унутраных спраў вайскоўцы гатовыя да забеспячэння нацыянальнай бяспекі.

Пра тое, што Украіна працягвае ўладкоўваць абарончыя пазіцыі на мяжы з Беларуссю, паведаміла 21 снежня 2023 года камандаванне Аб’яднаных сіл украінскіх Узброеных сіл (АС УСУ).

Украінскія войскі ўладкоўваюць камандныя вышыні, ствараюцца “батальённыя рубяжы абароны, якія складаюцца з ротных і ўзводных апорных пунктаў”, паведаміў камандуючы АС УСУ Сяргей Наеў. На палях ваенныя інжынеры пракопваюць траншэі, супрацьтанкавыя равы, усталёўваюць загараджальныя тэтраэдры і расцягваюць калючы дрот.

У канцы кастрычніка камандуючы Наеў заяўляў, што ў памежжы з Украінай знаходзіцца 1,8 тыс. беларускіх вайскоўцаў.