Ціханоўская заклікала сусветную супольнасць рашуча адрэагаваць на масавыя затрыманні і ператрусы ў Беларусі

24 студзеня, Позірк. “Я шакавана ⟨…⟩ рэйдамі беларускага рэжыму супраць сем’яў палітычных зняволеных. Я заклікаю сусветную супольнасць рашуча адрэагаваць на гэтае злачынства”, — напісала дэмакратычны лідар Святлана Ціханоўская ў сацсетцы X.

Ціханоўская адзначыла, што сярод затрыманых жонка прыгаворанага да 14 гадоў зняволення палітыка Мікалая Статкевіча Марына Адамовіч.

23 студзеня ў межах масавых ператрусаў і затрыманняў па ўсёй краіне былі затрыманыя дзясяткі людзей, на вечар праваабаронцам былі вядомыя імёны 84 затрыманых.

Паводле інфармацыі цэнтра “Вясна”, “частку з іх затрымалі, у некаторых проста правялі ператрус і адпусцілі”.

Адзначаецца, што пры вызваленні сілавікі ўручаюць “падпіскі аб неразгалошванні”.

“У пастановах супрацоўнікаў КДБ фігуруюць артыкулы за “фінансаванне экстрэмісцкай дзейнасці” і “ўдзел у экстрэмісцкіх фармаваннях”, — удакладняецца ў паведамленні.

Дакладная колькасць затрыманых не называецца.

Частка затрыманняў, паводле папярэдняй інфармацыі, звязана з арганізацыяй INeedHelpBY — ініцыятывай па аказанні харчовай дапамогі рэпрэсаваным. 23 студзеня КДБ прызнаў яе “экстрэмісцкім фармаваннем”.

“Позірку” вядома мінімум пра сем затрыманняў: у Віцебскай вобласці затрымана не менш за пяць чалавек — тры ў Наваполацку, два ў Полацку, яшчэ два — у іншых рэгіёнах.

Як паведамілі “Позірку” крыніцы, апытанні праводзіліся ў КДБ і Следчым камітэце, сілавікоў цікавілі харчовыя перадачы, якія родныя палітвязняў атрымлівалі праз сэрвіс дастаўкі гандлёвай сеткі “Еўраопт”. У некаторых затрыманых пасля ператрусаў была канфіскаваная тэхніка.

Гл. таксама:

У Беларусі хваля затрыманняў сваякоў палітвязняў (дапоўнена)

СМІ: Затрымана Марына Адамовіч — жонка палітвязня Статкевіча (дапоўнена)

Ціханоўская: Сёння ніхто ў Беларусі не можа адчуваць сябе ў бяспецы