Колькасць замежных студэнтаў у Беларусі за пяць гадоў павялічылася амаль на чвэрць

25 студзеня, Позірк. З 2018 года працягваецца штогадовы рост колькасці замежнікаў, якія навучаюцца ў ВНУ Беларусі. За 5 гадоў іх стала больш на 5,9 тыс., паведамляецца ў зацверджанай пастановай Саўміна ад 23 студзеня 2024 года канцэпцыі міграцыйнай палітыкі Беларусі на 2024–2028 гады.

“[Колькасць замежных студэнтаў вырасла] з 23,8 тыс. навучэнцаў у 2018/2019 навучальным годзе да 29,7 тыс. чалавек у 2022/2023 <…>”, — удакладняецца ў дакуменце. Рост склаў 24,8%.

“Найбольш распаўсюджаныя — адукацыйныя праграмы і праходжанне стажыровак у рамках рэалізацыі дзяржаўнай праграмы ў сферы адукацыі, міжвузаўскіх дамоваў і ўдзелу ў міжнародных праграмах”, — адзначаецца ў канцэпцыі.

Сцвярджаецца, што штогод беларускія ВНУ накіроўваюць больш за 2 тыс. студэнтаў “для праходжання кароткатэрміновага навучання ў адукацыйныя арганізацыі замежных дзяржаў”. Таксама беларусы “выязджаюць для навучання за мяжу самастойна”.

“Паводле інфармацыі кампетэнтных органаў РФ, за 6 месяцаў 2023 года на міграцыйны ўлік у мэтах вучобы пастаўлена 3.323 грамадзяніна Рэспублікі Беларусь”, — прыводзяць дадзеныя аўтары дакумента.