Беларусь, нягледзячы на запэўненні Лукашэнкі, парушыла дагавор па пастаўцы транспарту ў Новасібірск

29 студзеня, Позірк. Беларусь не выканала ўмовы дагавора па пастаўцы пасажырскага транспарту ў Новасібірск (Расія), вынікае з інфармацыі мясцовага медыя “Атас.Інфа”.

На аператыўнай нарадзе ўрада Новасібірскай вобласці 29 студзеня часовы выканаўца абавязкаў мэра сталіцы рэгіёну Алег Клемешаў заявіў, што “са 120 тралейбусаў паступіла 95”.

“На даручэнне губернатара арганізавана камандзіроўка ў Мінск, перагаварылі як па трамваях, так і па тралейбусах, — сказаў чыноўнік. — МАЗ і “Белкамунмаш” свае абавязацельствы будуць выконваць. Па трамваях — паступіла шэсць з дзесяці і адзін на шляху. Да сакавіка плануем завяршыць пастаўку з 10 вагонаў. Па тралейбусах — МАЗ плануе да красавіка ўсе кузавы з 80 выдаць Уфімскаму заводу”.

26 чэрвеня 2023 года губернатар Новасібірскай вобласці Андрэй Траўнікаў на нарадзе па рэгіянальнай праграме абнаўлення гарадскога тралейбуснага парку заявіў, што “да канца года [Новасібірск] атрымае 120 новых тралейбусаў”. Пры гэтым ён падкрэсліў, што “з боку фінансавання затрымак няма”.

Праз тры з паловай месяцы, 10 кастрычніка, Аляксандр Лукашэнка на сустрэчы з Траўнікавым у Мінску заявіў, што Беларусь “мае магчымасць дапамагчы” расійскаму суб’екту “вырашыць праблемы з абнаўленнем парка пасажырскага транспарту і іншай тэхнікі”. Добрым прыкладам вытворчай кааперацыі ён назваў мадэрнізацыю трамваяў на магутнасцях, створаных “Белкамунмашам” у Новасібірскай вобласці.

На думку Лукашэнкі, паколькі Новасібірск з’яўляецца адміністрацыйным цэнтрам Сібіры, праект “можна і трэба маштабаваць з улікам патрэбаў іншых рэгіёнаў”.

“Я гарантую вам, што ўсе нашыя дамоўленасці будуць безумоўна выкананыя, прытым якасна і ў тэрмін”, — заявіў ён суразмоўцу.