29 студзеня, Позірк. Эканамічны суд Мінска прыняў да вытворчасці справу аб банкруцтве ТАА “Парк забаў Дрымлэнд”. Інфармацыя пра гэта апублікаваная 29 студзеня ў Адзіным дзяржаўным рэестры звестак аб банкруцтве.
Пасяджэнне пройдзе 24 красавіка, весці працэс прызначаны суддзя Аляксей Русецкі.
З апублікаваных дадзеных вынікае, што патрабаванні крэдытораў прымаюцца да 29 сакавіка ТАА “АльтэрДырэкт”, прызначаным антыкрызіснай кіруючай кампаніяй па справе. Даўгі забаўляльнага парку складаюць больш за 1,85 млн рублёў, актывы ацэненыя ў 112,6 тыс. рублёў.
Аб ліквідацыі “Дрымлэнда” стала вядома ўлетку 2023 года, паведамлялася, што “ўласнік страціў цікавасць да праекту”.
Парк забаў належыць кампаніі “ТрастХоуп”, якой валодае прадпрымальнік Аляксандр Цэнтэр.
У жніўні мінулага года стала вядома, што на месцы “Дрымлэнда” адкрыюць Парк народнага адзінства.
Забаўляльны парк “Дрымлэнд” працаваў у Мінску з 2004 года.
