30 студзеня, Позірк. Савет міністраў пастановай № 63 ад 26 студзеня ўхваліў праект пагаднення з урадам Кітая аб тэхніка-эканамічнай дапамозе ў якасці асновы для правядзення перагавораў.
У адпаведнасці з дакументам, апублікаваным 30 студзеня на Нацыянальным прававым інтэрнэт-партале, правесці перагаворы і пры неабходнасці ўнесці ў праект непрынцыповыя праўкі ўпаўнаважанае Міністэрства эканомікі. Падпісаць яго даручана Міністэрству замежных спраў.
На што будуць скіраваныя кітайскія сродкі, не ўдакладняецца.
Улетку 2020 года першы намеснік прэм’ер-міністра Мікалай Снапкоў заявіў, што з 2015 года Беларусь штогод атрымлівае ад Кітая тэхніка-эканамічную дапамогу ў памеры 130 млн долараў.
Паведамлялася, што грошы ідуць на ўзвядзенне сацыяльнага жылля, інтэрнатаў, інфраструктуры індустрыяльнага парка “Вялікі камень” у Смалявіцкім раёне (Мінская вобласць), будаўніцтва ў Мінску нацыянальнага футбольнага стадыёна і басейна міжнароднага стандарту.
