У 2023 годзе навуковыя ступені ў Беларусі надалі 44 замежнікам, у тым ліку пяці ўкраінцам

6 лютага, Позірк. У 2023 годзе Вышэйшая атэстацыйная камісія (ВАК) надала навуковыя ступені 44 замежным грамадзянам з 12 дзяржаў, паведаміў на прэс-канферэнцыі 6 лютага ў Мінску старшыня ВАК Аляксандр Гучок.

Паводле яго слоў, званні атрымалі грамадзяне Кітая — 21, Расіі — 6, Ірака і Узбекістана — па 2 ды інш. Звяртае на сябе ўвагу той факт, што дысертацыі на суісканне навуковай ступені ў Беларусі летась абаранілі пяць украінскіх грамадзян (афіцыйны Мінск падтрымлівае расійскую агрэсію супраць Украіны, бакі скасавалі пагадненне аб узаемным прызнанні навуковых ступеняў).

Усяго ў 2023 годзе навуковыя званні нададзеныя 344 суіскальнікам (у 2022 годзе — 308, 2019-м — 358): доктара навук — 51, кандыдата навук — 293.

Акрамя таго, званне прафесара атрымалі 94 чалавекі, дацэнта — 514.

Сярэдні ўзрост суіскальніка навуковай ступені доктара навук склаў 53,4 года, кандыдата — 36 (у 2022 годзе 50 і 38 гадоў адпаведна).

Сярод галін традыцыйна лідзіравала медыцына (17,7% усіх паспяхова абароненых дысертацый), тэхнічныя навукі (каля 15%), эканамічныя (каля 10%), сказаў Гучок.

У 2023 годзе ВАК не зацвердзіў 26 дысертацый па 9 галінах навук. На рашэнне камісіі пададзена тры апеляцыі, адна задаволена.

ВАК настрыфікаваў 31 дакумент аб навуковых ступенях, выдадзены замежнымі атэстацыйнымі органамі.