Хакейныя зборныя Беларусі і Украіны могуць сустрэцца ў турніры за пуцёўку на Алімпіяду-2026

12 лютага, Позірк. Зборныя Украіны і Беларусі могуць сустрэцца ў турніры, на якім будзе разыгрывацца пуцёўка на Алімпійскія гульні 2026 года ў Італіі, паведамляе belarushockey.com.

Рэсурс звярнуў увагу на тое, што ўкраінская зборная выйшла ў фінальны раунд кваліфікацыі, перамогшы на кваліфікацыйным турніры, які прайшоў у Польшчы. Такім чынам, яна трапіла ў групу D, у якой знаходзяцца Славакія, Казахстан і Беларусь. На АГ-2026 паедзе толькі тая каманда, якая зойме першае месца ў групе. Фінальная кваліфікацыя пройдзе ў Браціславе (Славакія) з 29 жніўня па 1 верасня 2024 года.

Спартыўны рэсурс адзначае, што для зборнай Беларусі гэта тэарэтычная пазіцыя “пасеву” да таго, як будзе прынята рашэнне пра вяртанне нацыянальнай каманды ў праграму спаборніцтваў Міжнароднай федэрацыі хакея на лёдзе (IIHF), на падставе рашэння якой зборныя Беларусі і РФ адхіленыя ад удзелу ў турнірах пад яе эгідай.

Удзел зборных Беларусі і РФ на будучай Алімпіядзе пакуль пад пытаннем. IIHF мусіць прыняць адпаведнае рашэнне на гэтым тыдні, паведамляе belarushockey.com.

Пра тое, што зборныя Беларусі і Расіі ўключаны IIHF у лік патэнцыйных удзельнікаў АГ-2026, стала вядома 31 кастрычніка 2023 года. Тады паведамлялася, што гэтае пытанне будзе разгледжана ў сакавіку 2024 года.

Праз поўнамаштабную вайну ва Украіне, якую Расія пачала ў тым ліку з выкарыстаннем беларускай тэрыторыі, хакейныя зборныя дзвюх краін не былі дапушчаныя да чэмпіянату свету 2022 года ў Фінляндыі. 27 траўня таго ж года IIHF забараніла беларусам і расіянам удзельнічаць у першынстве свету 2023 года.

Апошні раз зборныя Беларусі і РФ краін удзельнічалі ў ЧС-2021. Беларусы занялі перадапошняе — 15-е месца, расіяне — 5-е.

Зімовыя Алімпійскія гульні пройдуць 6–22 лютага 2026 года ў італьянскіх Мілане і Корціна-д’Ампецо.