СМІ: У базе крымінальнага вышуку МУС РФ фігуруюць імёны прадстаўнікоў АПК і НАУ

13 лютага, Позірк. У базе вышуку расійскага Міністэрства ўнутраных спраў фігуруюць імёны больш як 3 тыс. грамадзян і ўраджэнцаў Беларусі, у іх ліку — прадстаўнікі дэмакратычных сіл і добраахвотнікі, якія ваююць ва Украіне супраць РФ.

Расійская “Медыязона” паведамляе, што па стане на пачатак лютага па крымінальных справах адшукваліся 96.752 чалавек, яшчэ 41.535 — як зніклыя без вестак.

У гэтай базе фігуруе 3.186 грамадзян і ўраджэнцаў Беларусі, большасць з іх – мужчыны (89%), удакладняе “Медыязона Беларусь”.

У спіс трапілі прадстаўнікі Аб’яднанага пераходнага кабінета Валерый Сахашчык і Вольга Гарбунова, экс-амбасадар у Аргенціне і член НАУ Уладзімір Астапенка, дарадцы Святланы Ціханоўскай Аляксандр Дабравольскі і Франак Вячорка, а таксама кіраўнік NEXTA Сцяпан Пуціла. Таксама ў ім лічацца не менш за 60 беларускіх добраахвотнікаў, якія ваююць ва Украіне супраць РФ (у тым ліку загінуўшыя Эдуард Лобаў і Павел Горбач).

6 лютага амбасадар Беларусі ў Расіі Дзмітрый Круты заявіў, што Мінск і Масква вядуць работу над аб’яднаннем “спісаў экстрэмістаў і экстрэмісцкіх рэсурсаў”. Ён выказаў надзею, што “найбліжэйшым часам гэта будзе вырашана”.