Кубракоў: Увесь Мінск знаходзіцца пад відэаназіраннем
Іван Кубракоў
19 лютага, Позірк. У Міністэрстве ўнутраных спраў падчас выбараў будзе дзейнічаць аператыўна-сітуацыйны штаб, паведаміў кіраўнік ведамства Іван Кубракоў у эфіры праграмы “Тыдзень” на тэлеканале СТБ 18 лютага.
“У выпадку нейкіх надзвычайных сітуацый я напрост буду дакладваць кіраўніку дзяржавы”, — заявіў ён.
“Сёння ўвесь горад Мінск поўнасцю практычна знаходзіцца пад відэаназіраннем”, — дадаў Кубракоў.
Паводле яго слоў, выява з камер назірання на аб’ектах з выбарчымі ўчасткамі “будзе выведзена” ў названы штаб.
Створаны “спецыяльныя працоўныя месцы для супрацоўнікаў [міліцыі], якія будуць кантраляваць толькі выбарчыя ўчасткі”, сказаў кіраўнік ведамства.
“Мы ўводзім уступныя такія, да якіх супрацоўнікі недзе не гатовыя. Бо прадбачыць, што можа адбыцца… Мы не ведаем. Мы бачылі 2020 год. Былі такія варыянты, дзе мы нават не маглі падумаць, што, напрыклад, напад можа быць на выбарчую камісію, на супрацоўнікаў органаў унутраных справаў”, — заявіў Кубракоў.
Паводле яго слоў, сістэма МУС “робіць усё для таго, каб не было ўздзеяння як на членаў выбарчых камісій, на старшынь участковых камісій, так і на іх сем’і”: “Таму што мы памятаем 2020 год, калі спрабавалі пагражаць сем’ям, дзецям — не грэбавалі нічым”.
Начальнік галоўнага ўпраўлення аховы правапарадку і прафілактыкі МУС Аляксандр Купчэня заявіў аб магчымым прыцягненні на выбарчыя ўчасткі мабільных груп хуткага рэагавання “з ліку супрацоўнікаў органаў унутраных спраў і спецпадраздзяленняў у поўнай экіпіроўцы, узброеных аўтаматычнай зброяй”.
Яны будуць працаваць у Мінску, абласных і раённых цэнтрах, удакладніў Купчэня.
Раней паведамлялася, што з 19 лютага (за дзень да пачатку датэрміновага галасавання) асабовы склад органаў унутраных спраў і ўнутраных войскаў будзе пераведзены на “ўзмоцнены варыянт службы”, які прадугледжвае кругласутачнае дзяжурства на ўсіх выбарчых участках.
У гэтым годзе ўпершыню ў Беларусі пройдуць аб’яднаныя выбары ў Палату прадстаўнікоў Нацыянальнага сходу (ПП НС) і мясцовыя саветы дэпутатаў. Адзіны дзень галасавання прызначаны на 25 лютага.
На 110 месцаў у ПП НС восьмага склікання прэтэндуе 265 кандыдатаў, на 12.512 месцаў у мясцовых саветах дэпутатаў — 18.802. Сярэдні конкурс — 2,4 і 1,5 чалавека на месца адпаведна. Сярод кандыдатаў няма супернікаў рэжыму Аляксандра Лукашэнкі.
Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі, у гэтым актыўна ўдзельнічае судовая сістэма.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.
Мінская міліцыя правяла перад выбарамі вучэнні са спецтэхнікай і аўтамабілем, які палаў
15 лютага, Позірк. "Тактыка-спецыяльныя заняткі падраздзяленняў органаў унутраных спраў мінскага гарнізона па нясенні службы на выбарчых участках" праведзены 14 лютага. "Асноўныя задачы мерапрыемства – павысіць узровень падрыхтоўкі і зладжанасці дзеянняў пры спыненні парушэнняў грамадскага парадку ў памяшканнях выбарчых участкаў і …