Мінск 17:51

ВС: У 2023 годзе колькасць асуджаных паводле “наркатычных” артыкулаў скарацілася амаль на 10%

Фота: unsplash.com

20 лютага, Позірк. У Беларусі ў 2023 годзе на 9,61% (з 2.467 да 2.230) скарацілася колькасць асуджаных паводле артыкулаў, звязаных з незаконнымі дзеяннямі ў дачыненні да наркотыкаў, вынікае са статыстыкі, апублікаванай прэс-службай Вярхоўнага суда.

Значная частка (2.102, або 94,26%) прыгавораныя паводле арт. 328 Крымінальнага кодэкса (незаконны абарот наркатычных сродкаў, псіхатропных рэчываў, іх прэкурсораў і аналагаў) — годам раней 2.383, або 96,6%.

Да рэальнага пазбаўлення волі за незаконны абарот наркотыкаў без мэты збыту (ч. 1 арт. 328 КК) асуджана 254 чалавекі, або 19,8% (у 2022-м — 249, 17,8%).

Абмежаванне волі ў структуры пакаранняў за злачынствы, прадугледжаныя гэтым артыкулам, атрымалі 843 чалавекі (65,7%), у 2022-м — 955 (68,1%). Семярым асуджаным прызначаны штраф (2).

Колькасць асуджаных паводле ч. 1 арт. 328 КК з адтэрміноўкай выканання пакарання, умоўным непрымяненнем пакарання — 178, або 13,9% (194, 13,8%).

13 непаўналетніх асуджаныя за незаконны абарот наркотыкаў без мэты збыту (16) — ім прызначанае пакаранне ў выглядзе абмежавання волі.

Колькасць асуджаных паводле чч. 2–5 арт. 328 КК знізілася за год на 16,5% — з 981 (41,2% ад усіх асуджаных) да 819 (39%).

61 непаўнагадовы асуджаны за незаконны абарот наркотыкаў з мэтай збыту (97). З іх 43 пакараныя паводле ч. 4, 17 — паводле ч. 3, 1 — паводле ч. 2 арт. 328 КК. Усім прызначана пакаранне ў выглядзе рэальнага пазбаўлення волі.

20 чэрвеня 2023 года ў Мазыры (Гомельская вобласць) тры прадстаўніцы грамадзянскай ініцыятывы “Маці 328” сустрэліся з генеральным пракурорам Андрэем Шведам, які праводзіў выязны прыём грамадзян. Як сцвярджалася, па выніках размовы кіраўнік нагляднага органа “пагадзіўся практычна з усімі довадамі маці, якія лічаць тэрміны за нарказлачынствы нерэлевантнымі, а справы па самай жорсткай ч. 4 артыкула [328 КК] часцяком адкрыта сфальсіфікаванымі”.

15 студзеня стала вядома, што пасля той сустрэчы Швед даручыў распачаць крымінальную справу “па факце ўцечкі інфармацыі” ў “экстрэмісцкія” тэлеграм-каналы і СМІ.

Адзначалася, што пераслед актывістак руху працягваецца дагэтуль: “Іх абзвоньваюць сілавікі, выклікаюць на допыты, правяраюць тэлефоны”. Мэтай з’яўляецца “выяўленне адміністратараў сацсетак і тэлеграм-каналаў, якія аб’ядноўваюць сваякоў асуджаных”.

Падзяліцца: