Ціханоўская прапанавала ПА АБСЕ прызначыць спецдакладчыка альбо аднавіць дзейнасць рабочай групы па Беларусі
Святлана Ціханоўская на ПА АБСЕ ў Вене
22 лютага, Позірк. Прызначыць спецыяльнага дакладчыка па Беларусі альбо аднавіць дзейнасць адпаведнай рабочай групы Парламенцкай асамблеі АБСЕ прапанавала беларускі дэмакратычны лідар Святлана Ціханоўская, выступаючы 22 лютага ў Вене на пасяджэнні трэцяга камітэта па пытаннях дэмакратыі, правах чалавека і гуманітарных пытаннях у рамках зімовай сесіі ПА АБСЕ.
Паводле яе слоў, асамблея “павінна ясна даць зразумець, што злачынствы Лукашэнкі не будуць трываць”. “Нам патрэбны голас у ПА АБСЕ, які будзе дакладваць аб сітуацыі ў Беларусі”, — падкрэсліла дэмлідар.
Заўважыўшы, што “ў гэтую нядзелю рэжым правядзе фіктыўныя выбары ў так званы парламент”, Ціханоўская заклікала ПА АБСЕ “не прызнаваць гэтыя выбары, як гэта ўжо зрабілі Парламенцкая асамблея Савета Еўропы і Еўрапейскі парламент”.
Яна таксама выступіла з ініцыятывай запрасіць у якасці назіральнікаў у ПА АБСЕ прадстаўнікоў беларускага дэмакратычнага руху і палітычных партый, якія ўжо ўдзельнічаюць у працы ПАСЕ. “Іх удзел у асамблеі дазволіць пачуць голас беларусаў, а ПА АБСЕ прадэманструе смеласць і прыхільнасць уласным прынцыпам”, — адзначыла дэмлідар.
Спецыяльны камітэт, а затым рабочая група Парламенцкай асамблеі АБСЕ па Беларусі дзейнічалі ў 1998—2013 гадах. З 2002 года групу ўзначальвала дэпутат нямецкага Бундэстага Ута Цапф.
Падрабязнасці даступныя падпісчыкам “Позірк+”