40% дэпутатаў новага склікання Палаты прадстаўнікоў былі супрацоўнікамі дзяржорганаў — ЦВК
1 сакавіка, Позірк. Вынікі выбараў дэпутатаў Палаты прадстаўнікоў Нацыянальнага сходу 8-га склікання зацверджаныя адпаведнай пастановай Цэнтральнай выбарчай камісіі, пра што было заяўлена на пасяджэнні гэтага органа 1 сакавіка.
Старшыня ЦВК Ігар Карпенка заявіў, што сярод 110 дэпутатаў 20 прадстаўнікоў папярэдняга склікання ніжняй палаты парламента (18,2%), а таксама 27 чалавек, якія былі дэпутатамі мясцовых саветаў 28-га склікання (24,5%). У новым складзе Палаты прадстаўнікоў 37 жанчын (33,6%).
Паводле слоў чыноўніка, супрацоўнікі дзяржаўных органаў складаюць 40% 8-га склікання ніжняй палаты; сферы навукі, адукацыі, аховы здароўя, культуры і спорту — 23,6%; прамысловасці, транспарту і будаўніцтва — 15,5%; сілавых структур — 7,3%; сферы гандлю, бытавога абслугоўвання і жыллёва-камунальнай гаспадаркі — 2,7%; іншых сфер дзейнасці — 10,9%.
Сёлета ў Беларусі ўпершыню прайшлі аб’яднаныя выбары — адзіны дзень галасавання 25 лютага (датэрміновае галасаванне праводзілася з 20 лютага). Фармат адзінага дня падгледжаны ў Расіі.
Адзіны дзень галасавання і электаральная кампанія ў цэлым прайшлі на фоне маштабных рэпрэсій і зачысткі палітычнага поля ад апазіцыі. У дэпутаты былі вылучаныя выключна прыхільнікі Аляксандра Лукашэнкі.
Пра непрызнанне выбараў заявіў Дзяржаўны дэпартамент ЗША, з адпаведным заклікам выступіла парламенцкая група “За дэмакратычную Беларусь” у Вярхоўнай Радзе Украіны. Выбары раскрытыкавалі знешнепалітычныя ведамствы Германіі, Даніі, Нарвегіі, Польшчы, Швецыі, група “Дэмакратычная Беларусь” у Бундэстагу, Група еўрапейскіх паслоў па правах чалавека, Парламенцкая асамблея Савета Еўропы (СЕ), прэзідэнт Кангрэса мясцовых і рэгіянальных улад СЕ.
У папярэдняй справаздачы місіі кампаніі “Праваабаронцы за свабодныя выбары”, якую арганізавалі праваабарончы цэнтр “Вясна” і Беларускі Хельсінкскі камітэт, адзначалася, што выбары дэпутатаў ПП НС 8-га склікання і мясцовых саветаў дэпутатаў 29-га склікання “не адпавядалі міжнародным стандартам правядзення дэмакратаў і свабодных выбараў, а таксама суправаджаліся шматлікімі парушэннямі выбарчага заканадаўства”.
Пераважную большасць месцаў у Палаце прадстаўнікоў занялі члены "Белай Русі" і беспартыйныя
26 лютага, Позірк. Каля дзвюх трацін дэпутатаў Палаты прадстаўнікоў Нацыянальнага сходу восьмага склікання — 70 са 110 — з'яўляюцца членамі праўладных палітычных партый, якія засталіся ў Беларусі, сведчыць праведзены "Позіркам" аналіз папярэдніх вынікаў адзінага дня галасавання 25 лютага. 51 месца ў ніжняй палаце парламента …