Латушка заклікаў пасла Ірландыі адрэагаваць на дзейнасць у гэтай краіне мінскага манастыра, які падтрымлівае агрэсію РФ
Алена Валынец — адна з сясцёр беларускага манастыра, якія наведалі Ірландыю
8 сакавіка, Позірк. З мэтай прыцягнуць увагу да “зламыснай дзейнасці” ў Ірландыі мінскага Свята-Елісавецінскага манастыра і прыняць у яго дачыненні неабходныя меры намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка звярнуўся да пасла гэтай брытанскай дзяржавы ў Польшчы Патрыка Хогі.
Латушка напісаў ірландскаму дыпламату ліст, змест якога стаў вядомы “Позірку“.
Беларускі палітык выказвае “вялікую заклапочанасць” у сувязі з паведамленнямі ў СМІ аб візіце ў Ірландыю сясцёр мінскага манастыра “для працы з беднымі”.
“Манастыр Святой Лізаветы <…> уцягнуты ў падтрымку вайны Расіі ва Украіне. Духоўнік манастыра Андрэй Лемяшонак выказваў падтрымку дзеянням РФ ва Украіне і заклікаў маліцца за [Аляксандра] Лукашэнку і [Уладзіміра] Пуціна. Акрамя таго, сцвярджаецца, што ў манастыры навучалі беларускіх падлеткаў зборцы і разборцы аўтаматычнай зброі”, — адзначае Латушка ў лісце.
“Адным з самых трывожных аспектаў” дзейнасці манастыра ён называе яго “фінансавую падтрымку расійскіх вайскоўцаў”.
“Манастыр арганізуе канцэрты ў падтрымку расійскай арміі і збірае харчы і сродкі для расійскіх вайскоўцаў, якія ўдзельнічаюць у вайне супраць Украіны. На гэтыя сродкі набываюцца розныя прадметы, у тым ліку рацыі, коптэры, цеплавізары, бронекамізэлькі, шлемы і нават аўтамабіль”, — канстатуе намеснік кіраўніка АПК.
Хоць “актывісты і праваабаронцы распачалі некаторыя намаганні, каб прыцягнуць увагу да дзейнасці манастыра”, падкрэслівае палітык, для яе спынення “неабходна зрабіць яшчэ больш”.
“Прашу пасольства Ірландыі ў Польшчы <…> прыняць да ведама гэтае пытанне і разгледзець магчымасць давядзення яго да ведама адпаведных органаў улады ў Ірландыі. Улічваючы прыхільнасць Ірландыі правам чалавека, міру і справядлівасці, я лічу вельмі важным разгледзець любыя дзеянні, якія падтрымліваюць агрэсію і падрываюць стабільнасць і бяспеку Украіны”, — заяўляе Латушка.
7 сакавіка каталіцкі партал globalsistersreport.org паведаміў аб прыездзе ў Ірландыю сясцёр Свята-Елісавецінскага манастыра Алены Валынец і Веранікі Васільевай. Мэтай візіту яны назвалі збор сродкаў для “сваіх праектаў за кошт продажу рускіх абразоў, прадметаў рэлігійнага прызначэння, а таксама сувеніраў”.
У публікацыі адзначаецца, што сёстры наведалі езуіцкую парафію ў Дубліне, а таксама прыходы і школы ў графствах Манаган і Лаўт, дзе “распавялі пра сваю працу з псіхічна хворымі, бяздомнымі, былымі зняволенымі і нарказалежнымі ў Мінску”.
Валынец і Васільева засталіся задаволеныя “цёплым прыёмам” і маюць намер зноў наведаць Ірландыю ў гэтым годзе.
Свята-Елісавецінскі манастыр рэгулярна ўдзельнічае ў акцыях, якія падтрымліваюць расійскую агрэсію ва Украіне.
У траўні 2023 года абіцель заявіла аб правядзенні ў Мінску канцэрту ў падтрымку “шпіталяў і параненых байцоў расійскай арміі, якія ўдзельнічаюць у спецаперацыі”. Адзначалася, што сабраныя сродкі пойдуць на “закупку медабсталявання і лекавых сродкаў для шпіталяў Данбаса”. Канцэрт быў анансаваны хэштэгам “Сваіх не кідаем”, папулярным у расійскай вайсковай прапаганды. На афішы мерапрыемства намалявалі лацінскую літару Z — сімвал ўварвання Расіі ва Украіну.
7 студзеня мінулага года падчас наведвання манастыра з нагоды праваслаўнага Раства Лукашэнка падтрымаў збор дапамогі для расійскіх вайскоўцаў на фронце. “Вы робіце правільна. Не звяртайце ўвагі на дзясятак-другі праплочаных людзей”, — заявіў Лукашэнка, дадаўшы, што “мы дапамагаем нашым рускім братам”.