У Латвіі заблакаваны сайты беларускіх дзяржСМІ ont.by і sb.by

18 сакавіка, Позірк. Нацыянальная рада па электронных СМІ Латвіі (NEPLP) закрыла доступ да дзевяці сайтаў, якія “распаўсюджваюць расійскую прапаганду”, паведамляе Delfi.lv.

Сярод іх сайты беларускага дзяржаўнага тэлеканала АНТ (ont.by) і выдавецкага дома “Беларусь сегодня” (sb.by, заснавальнік — адміністрацыя Аляксандра Лукашэнкі).

Рашэнне аб закрыцці доступу заснавана на тым, што гэтыя сайты выкарыстоўваюцца “для падтрымкі агрэсіўнай расійскай прапаганды”, на іх “распаўсюджваецца скажоная і ілжывая інфармацыя аб вайне Расіі супраць Украіны, і аб ваенных злачынствах, учыненых Расіяй, з мэтай іх апраўдання, распаўсюджваюцца “ненавісніцкія”. выказванні і інфармацыя, якая дыскрэдытуе Латвію і НАТО”.

“Атрыманне такой інфармацыі можа выклікаць у часткі насельніцтва трывогу і страх за існаванне сваёй дзяржавы, за ўласную будучыню, за будучыню сваёй сям’і, а таксама расколваць грамадства”, — гаворыцца ў заяве NEPLP.

Падкрэсліваецца, што сайты змяшчаюць дэзінфармацыю, што “можа прывесці да ўзнікнення і актывізацыі арганізацый, якія падтрымліваюць радыкальныя ідэі, а таксама іх супернікаў, што не выключае магчымасці пратэстаў розных груп унутры краін і тым самым уплывае на грамадскі парадак і бяспеку людзей, а таксама на бяспеку дзяржавы ў цэлым”.