Праходзіць вобшук у мінскай кватэры завочна асуджанага кіраўніка праекту “Маланка медыя” Марыніча

20 сакавіка, Позірк. У мінскай кватэры кіраўніка праекту “Маланка медыя” і заснавальніка платформы Zubr Паўла Марыніча сілавікі 20 сакавіка зладзілі вобшук.

“Вобшук праходзіць у кватэры па месцы прапіскі, дзе пражывае родны брат з сям’ёй, — цытуе яго “Маланка”. — Пакуль інфармацыі няма, чакаю копію пратакола вобшуку. У Мінску я не жыву з 2010 года і ў Беларусі ўвесь гэты час не быў. Пакуль я не ведаю, што яны там шукаюць, проста ствараюць “конскі тупат”, можа, чарговую крымінальную справу ўжо сфальсіфікавалі”.

Суд Заводскага раёна сталіцы завочна прыгаварыў Марыніча да 4 гадоў пазбаўлення волі паводле ч. 2 арт. 191 (перашкода працы Цэнтральнай выбарчай камісіі, а таксама камісій па рэферэндуме, здзейсненая з прымяненнем пагрозы і іншым спосабам, групай асоб па папярэдняй змове), паведаміла 18 сакавіка Генпракуратура.

Аналагічныя тэрміны пакарання па той жа справе вынесеныя кіраўніцы праекта “Сумленныя людзі” Алене Жываглод (Жылачкінай), старшаму палітычнаму дарадцу Святланы Ціханоўскай Аляксандру Дабравольскаму і стваральніку платформы “Голас” Паўлу Ліберу.