Лукашэнка: Нашы грамадзяне адчуваюць сябе ў бяспецы, але гэта не танна каштуе
21 сакавіка, Позірк. На фоне таго, што адбываецца ў суседніх краінах, Беларусь жыве “адносна нармальным, паўнавартасным жыццём”, заявіў Аляксандр Лукашэнка 21 сакавіка на сустрэчы з дэпутатамі Палаты прадстаўнікоў і членамі Савета Рэспублікі Нацыянальнага сходу сёмага склікання.
“Мы значна ўмацавалі свае Узброеныя сілы, — цытуе Лукашэнку яго прэс-служба. — Эканоміка дэманструе рост. Людзі працуюць і атрымліваюць заробак. На вуліцах гарадоў — спакой і парадак. Дзяржава выконвае свае сацыяльныя абавязацельствы. І самае галоўнае — нашы грамадзяне адчуваюць сябе ў бяспецы, не баяцца за жыцці родных і блізкіх. Гэта не танна каштуе. Дастойны ўклад у агульную справу ўнеслі і парламентарыі”.
Ён пералічыў “шэраг выклікаў”, з якімі за апошнія гады сутыкнулася Беларусь: пандэмія, палітычныя падзеі 2020 года, калі “дамарослыя экстрэмісты з дапамогай заходніх замежных спонсараў замахнуліся на асновы беларускай дзяржаўнасці”.
Паводле сцвярджэння Лукашэнкі, у 2020 годзе “дэпутатаў, сенатараў, іх родных і блізкіх спрабавалі запалохаць, а часам і наўпрост пагражалі фізічнай расправай” з мэтай “пасеяць смуту і раскол у дзяржаўных органах”.
Яшчэ адным выклікам ён назваў “геапалітычны разлом”: “Маштабны, сістэмны крызіс, сімптомы якога відавочныя нам усім, не толькі ў ваенна-палітычнай, але і ў эканамічнай, гуманітарнай сферах. Нормы і прынцыпы міжнароднага права сталі падмяняцца інструментамі палітычнага і эканамічнага ціску. Месца дыпламатыі ўсё больш займае палітыка санкцый. Прытым санкцый на знішчэнне”.
Разам з тым, сказаў Лукашэнка, у дзяржавах, з якімі сябруе Беларусь, жыве большасць насельніцтва планеты. “Іх эканомікі, — дадаў ён, — складаюць значную частку сусветнага ВУП. Тут велізарныя рынкі для збыту нашых прадукцыі і тэхналогій”.
У Беларусі не спыняюцца рэпрэсіі, пачатыя пасля прэзідэнцкіх выбараў 2020 года, 1.411 чалавек прызнаныя праваабарончай супольнасцю палітвязнямі.
Упраўленне вярхоўнага камісара ААН па правах чалавека (УВПКЧ) “мае разумныя падставы меркаваць, што <…> з 1 мая 2020 года па 31 снежня 2023 года ў Беларусі працягвалі здзяйсняцца шматлікія парушэнні міжнароднага права ў галіне правоў чалавека”, гаворыцца ў дакладзе вярхоўнага камісара, ухваленага 20 сакавіка на 55-й сесіі Савета ААН па правах чалавека.
Афіцыйны Мінск падтрымлівае расійскую агрэсію ва Украіне, на тэрыторыі якой праходзіць найбуйнейшы ваенны канфлікт у Еўропе з часоў Другой сусветнай вайны.