“Кіберпартызаны” заявілі аб узломе сайта дзяржаўнай “Гомельскай праўды”

25 сакавіка, Позірк. Група ананімных хакераў “Кіберпартызаны” ўзламала сайт дзяржаўнай газеты “Гомельская праўда” (“Праўда Гомель”, gp.by), размясціўшы на ім віншаванне з Днём Волі, сцвярджаецца ў сацсетках ініцыятывы.

“У 1918 годзе беларусы аб’явілі ўсяму свету, што мы народ і што Беларусь — свабодная і незалежная краіна. Але за сапраўдную свабоду нам яшчэ змагацца. Лёс нашага народа і краіны вырашаецца зараз і залежыць толькі ад беларусаў. Заклікаем далучыцца да барацьбы ўсіх, хто хоча жыць у свабоднай Беларусі”, — гаворыцца ў тэксце.

Там таксама гучыць заклік уступаць у полк Каліноўскага, які ваюе ва Ўкраіне

Сайт gp.by зараз не працуе, на ім паведамляецца аб правядзенні тэхнічных работ.

Праз паўтары гадзіны ініцыятыва паведаміла таксама аб узломе партала навін infobaza.by, распрацоўшчыка ваеннай тэхнікі “Мінатор-сэрвіс” і Эканамічнага суда СНД, які базуецца ў Мінску.

На старонках з’явілася аналагічная інфармацыя.

10 сакавіка “Кіберпартызаны” паведамілі аб узломе сайта рэспубліканскага дзяржаўна-грамадскага аб’яднання “Добраахвотнае таварыства садзейнічання арміі, авіяцыі і флоту Рэспублікі Беларусь” (ДТСААФ).

31 снежня мінулага года — аб узломе сайта дзяржаўнага інфармацыйнага агенцтва БелТА. Паведамлялася таксама аб пашкоджанні ўнутранай сеткі і дамен-кантралёраў інфармагенцтва, аб спампоўцы 90 гігабайт дадзеных — унутраных дакументаў, бухгалтэрыі, асабістай інфармацыі аб супрацоўніках, архіва.

Пасля ўзлому на партале БелТА былі размешчаны матэрыялы і фатаграфіі пратэстнага зместу.