Швецыя пацвердзіла гатоўнасць выдаваць беларусам з пратэрмінаванымі дакументамі пашпарт замежніка
27 сакавіка, Позірк. Беларусы з пратэрмінаванымі нацыянальнымі дакументамі могуць атрымліваць пашпарт замежніка ў Швецыі, вынікае з прававога заключэння Міграцыйнага агенцтва гэтай скандынаўскай дзяржавы.
У дакуменце гаворыцца пра “важнасць даць беларускім грамадзянам магчымасць атрымаць пашпарт” ва ўмовах, калі яны не могуць зрабіць гэта на радзіме.
“Згодна з наяўнай інфармацыяй, грамадзяне Беларусі, якія знаходзяцца за мяжой, не могуць атрымаць новыя пашпарты праз замежнае прадстаўніцтва краіны”, — гаворыцца ў тлумачэнні.
Разглядаючы пытанне выдачы пашпарта замежніка, супрацоўнікам ведамства трэба ацэньваць магчымасць атрымання тым ці іншым грамадзянінам Беларусі нацыянальнага пашпарта на радзіме з улікам “цяжкасцей, звязаных з паездкай у краіну паходжання”, і іншымі абставінамі.
“У цяперашніх умовах не трэба заахвочваць беларусаў да паездак у сваю краіну для атрымання пашпарта. На практыцы гэта азначае, што грамадзяне Беларусі, якія знаходзяцца за мяжой, не могуць атрымаць дзейны як пашпарт дакумент”, — гаворыцца ў дакуменце.
Міграцыйная служба Швецыі падкрэсліла, што “дзеянне пашпарта замежніка”, выдадзенага беларускаму грамадзяніну, што не можа абнавіць нацыянальны дакумент, “павінна быць абмежавана такім чынам, каб ён не быў сапраўдны ў Беларусі”.
4 верасня 2023 года Аляксандр Лукашэнка падпісаў указ № 278 “Аб парадку выдачы дакументаў і здзяйснення дзеянняў”, які пазбавіў замежныя ўстановы Беларусі магчымасці падаўжаць тэрмін дзеяння пашпарта беларускага грамадзяніна і выдаваць новыя дакументы.
Беларускія дэмакратычныя структуры, Еўрасаюз, ЗША, праваабарончыя арганізацыі раскрытыкавалі ўказ, скіраваны, на іх думку, на ўшчамленне правоў вымушаных эмігрантаў.
Праваабаронцы фіксуюць выпадкі затрымання на мяжы беларусаў, якія вяртаюцца дамоў з замежжа.
Дыпламатаў краін ЕС заклікалі падтрымаць праект "пашпарта новай Беларусі"
23 сакавіка, Позірк. З заклікам падтрымаць праект "пашпарта новай Беларусі" звярнулася дэмакратычны лідар Святлана Ціханоўская на сустрэчы з дыпламатамі 16 дзяржаў Еўрапейскага саюза. Прэс-служба палітыка паведаміла, што сустрэча адбылася 22 сакавіка ў Вільнюсе. Офіс Ціханоўскай наведала дэлегацыя на чале са спецыяльным пасланнікам …